சுவர்

ஊட்டி பயணம் - புகைவண்டியில் - பகுதி 1

2010-07-21T11:05:00.000-07:00

அண்மையில் நானும் எனது அலுவலக நண்பர்கள் எட்டுபேரும் ஊட்டிக்கு மலை ரயிலில் பயணம் செய்தோம். ஏறத்தாழ ஒன்றரை மாதங்களுக்கு முன்பு முன்பதிவு செய்திருந்தோம். நாங்கள் சென்றபோது மழைக்காலம் துவங்கியிருந்தது. வண்டியில் மேலே சென்று சேருவோமா என்பது சந்தேகமாகவே இருந்தது. ஏனெனில் அதற்கு முந்தைய வாரம் தான் ஒரு நாள் ரயில் குகை ஒன்றினுள் செல்லும் போது புகை அதிகமாகி ஓட்டுனர்கள் மூர்ச்சையடைந்திருந்ததாக செய்தி வெளிவந்தது.

கோவையில் இருந்து நீலகிரி விரைவு வண்டியில் மேட்டுப்பாளையம் வரை சென்று அங்கிருந்து மலை இரயிலில் குன்னூர் வழியாக உதகமண்டலம் செல்ல வேண்டும். மேட்டுப்பாளையத்தில் இறங்கிய போது காலை மணி 6:15. ஊட்டி ரயில் புறப்படும் நேரம் 7:15. துணியை இசுத்திரி போடும் கடையில் காலையில் கடையைத் திறந்தவுடம் கடைக்காரர் ஒரு சட்டியில் கரியைப் போட்டு எரியவிட்டுக் கொண்டிருப்பார். அதுபோலவே தனியாக நின்றிருந்த நீராவி எஞ்சினின் கரிப்பெட்டியில் ஒரு அம்மாள் நிலக்கரிக் குவியலில் இருந்து ஒவ்வொரு சட்டியாக கரியை எடுத்து வந்து அருகே வைத்திருந்த இரும்புப் படியின் மீதேறி அதற்குள் கரியைக் கொட்டினார். பாய்லரில் கரியை கொட்டி நெருப்பை வளர்த்துக் கொண்டிருந்தனர் இன்னும் இருவர்.

மேட்டுப்பாளையத்தில் இருந்து கிளம்பியவுடன் முதல் நிலையம் கல்லாறு. அங்கு வண்டியை நிறுத்தி நீர் நிறைத்தனர். வண்டி ஐந்து நிமிடம் நின்றதால் எஞ்சின் பகுதியைப் பார்க்கச் சென்றோம். முன் புறம் ஓட்டுனர்கள் இருவர் இருந்தனர். இருவர் உடம்பிலும் இருந்து வியர்வை வழிந்து கொண்டிருந்தது. அவர்களு ள் ஒருவரின் கண்கள் சிவப்பேறி உலையில் எரிந்து கொண்டிருந்த பழுந்த நிலக்கரியை நினைவூட்டியது. அங்கிருந்து புறப்பட்ட வண்டி மலையில் ஏறத்தொடங்கியது. அழகிய பாலங்கள், குகைகளின் வழியாக முன்னே செல்லத் தொடங்கினோம். இடையில் ஒரு இடத்தில் இரயில் நிலையம் இல்லை எனினும் நீர் நிறைக்க ஒரு இடம் இருந்தது. அங்கு நின்று நீர் நிறைக்கப்பட்டது. அடுத்த நிலையம் இல்குரோவ் (Hill Grove). இங்கு வடையும் டீயும் கிடைத்தது. வண்டி பத்து பதினைந்து நிமிடம் நின்றது.

குன்னூர் சென்றதும் அங்கே நீராவி எஞ்சினைக் கழற்றி விட்டு டீசல் எஞ்சின் மாட்டப்பட்டு வண்டி ஊட்டி புறப்பட்டது. வழியில் அரவங்காடு நிலையத்தில் நின்ற போது அருகில் வெடிமருந்துத் தொழிற்சாலை தெரிந்தது.

ஐந்து மணிநேரத்தில் செல்ல வேண்டிய வண்டி ஆறு மணி நேரத்தில் ஊட்டியை அடைந்தது.

(தொடரும்)

பாட்டிகளும் பேத்திகளும்

2010-06-24T09:46:00.000-07:00

நகரங்கள் பெரிய இயந்திரங்களைப் போல எப்போதும் இயங்கிக் கொண்டே இருக்கின்றன. பேருந்தின் பொறி போல, புகையையும் சூட்டையும் கிளப்பியபடியே. ஒன்றை இன்னொன்றாக மாற்றுவதே இதன் வேலையாக இருக்கிறது. பஞ்சை நூலாகவும் நூலைத் துணியாகவும் மாற்றுகிறது. படிக்காதவனைக் கல்விமானாக. பெட்ரோலைப் புகையாக. மனிதனை நுகர்வோனாகவும் செய்கிறது. நகரங்களில் தான் எத்தனைவிதமான வேலைகள். காய்கறி விற்கலாம். கூடையிலும். வசதி இருந்தால் குளிரூட்டப்பட்ட உயர்ந்த கட்டிடங்களிலும். துணி விற்கலாம். வந்த துணியை தைத்துக் கொடுக்கலாம். தைத்தும் விற்கலாம். புகை பெருக்க கார் வண்டி விற்கலாம். புகை, சூட்டில் இருந்து தப்பிக்க காருக்கு ஏ.சி.யும் விற்கலாம்.

எஞ்சினின் பிஸ்டன் முன்னும் பின்னும் சென்று வருவதைப் போலவே நகரமாந்தர் வேலைக்கும் வீட்டுக்குமாய் நாள்தோறும் ஆண்டெல்லாம் ஓடவேண்டியிருக்கிறது. நகரங்களில் வசிக்கும் நாட்டின் பெரும்பாலான நடுத்தர மக்கள் கணவன், மனைவி இருவரும் வேலைக்குச் செல்ல வேண்டியிருக்கிறது. நிகழ்கால நடைவண்டியை நகர்த்தவோ அல்லது எதிர்கால குடைவண்டியைப் பெறவோ. மனிதன் மீது வைத்த நம்பிக்கையை இறைவன் இழந்துவிட வில்லை என்பதையே பிறக்கும் ஒவ்வொரு குழந்தையும் நிரூபிக்கிறது என்னும் தாகூரின் வாக்குப்படி உலகில் குழந்தைகள் பிறந்துகொண்டுதான் இருக்கின்றன.

இக்குழந்தைகளை வளர்ப்பது வீட்டுவேலைக்கு வரும் ஆயாக்களோ கிரீச்(Crech)களோ அல்லது குழந்தைகளின் பாட்டிமார்களுமே. குழந்தையைப் போலவே மாறும் நிலையை நோக்கிச் செல்லும் நகரங்களில் இருவர் வேலைக்குச் செல்லும் வீட்டில் உள்ள பாட்டிகளின் முக்கியப் பொறுப்பு, பேரன், பேத்திகளைப் பார்த்துக் கொள்வது. சாலையில் நடந்துசெல்லும் போது தெருவில் பேத்திகளை இடுப்பில் ஏந்தி சாலையில் வண்டிகளை வேடிக்கை காட்டி உணவூட்டையில் மனதில் பல யோசனைகள் விரியும்.

அந்தப்பாட்டியும் தன் பேத்தியைப் போல பூப்போல சிறுகுழந்தையாக இருந்தவள்தானே. அப்போது அவளது பாட்டியும் இதுபோல் வேடிக்கை காட்டி உணவூட்டியிருப்பாளோ. என்ன வேடிக்கை காட்டியது காருக்குப் பதில் மாட்டு வண்டியாக இருந்திருக்கலாம். பாட்டி சிறுவயதில் பேத்தியைப் போலவே இருந்திருப்பாளோ. இன்றைய பேத்திகளும் வளர்ந்து பள்ளி, கல்லூரி சென்று மணமுடித்து பிள்ளை பெற்று, வளர்த்து மணமுடித்துவைத்து பாட்டியாகப் போகிறவள்தானே. பேத்தி வயதானதும் தன் பாட்டியைப் போல் இருப்பாளோ. இன்றைய பேத்தி நாளை தன் பேத்திக்கு வேடிக்கை காட்டி சோறூட்ட எத்தனையோ புதிதாக இருக்கலாம். சோறிருக்குமா என்பது தான் சந்தேகம்.

எந்தவொரு பேத்திக்கும் உயிருடனோ இல்லாமலோ ஒரு பாட்டி கட்டாயம் இருந்தாக வேண்டும். ஆனால் அவளுக்கு ஒரு பேத்தி கட்டாயம் இருப்பாள் என்று கூறவியலாது. எனினும் ஒரு பேத்தி வருவாள் என்றுதான் பக்கத்து வீட்டிலோ எதிர்வீட்டிலோ அல்லது உலகின் ஏதோவொரு மூலையின் ஒரு பாட்டியிடம் ஒரு பேரன் வளர்ந்து கொண்டிருக்கின்றான்.

யானை மொழி

2010-06-04T10:35:00.000-07:00

ஒரு முறை நான் எனது நண்பர்களுடன் மூணாறு சென்றிருந்தேன். மூணாறு மேற்குத் தொடர்ச்சி மலையின் மீது அமைந்திருக்கும் ஓர் ஊர். முழுவதும் தேயிலைத் தோட்டங்கள் நிரம்பிய பகுதி. சுற்றுப் பகுதிகளில் அணைகளும் பலவுண்டு. வெப்பநிலை இதமாக இருப்பதால் சுற்றுலாவும் ஒரு முக்கியத் தொழில். சுற்றுலாப் பயணிகளுக்கு படகுச் சவாரி, கரிச்சவாரி, பரிச்சவாரி (கரி - யானை, பரி - குதிரை) முதலியன உண்டு. நண்பர்கள் யானைச் சவாரி செய்ய விரும்பினர். நானும் சேர்ந்து கொண்டேன். இதற்கு நான்கைந்து இடங்கள் இருந்தன. அவற்றில் நாங்கள் மலைச்சரிவில் தேவாலயத்தின் பின்னால் இருந்த யானைச் சவாரி நிலையத்தை அணுகினோம். அங்கு தேவாலயத்தை குருசடி என்றழைக்கின்றனர்.

அவ்விடம் மூன்று யானைகள் இருந்தன. நாங்கள் நால்வர். யானைக்கு இருவர் என இரண்டு யானைகளை அமர்த்தினோம். நான் சென்ற யானையின் பாகன் ஒரு தமிழர், இளைஞர். எனக்கு யானையின் பெயரைத் தெரிந்து கொள்ள ஆவலாயிருந்தது. கேட்டதில் யானையின் பெயர் யமுனா எனத்தெரிந்தது. எங்களை அழைத்துச் சென்ற வழி சரிவாக இருந்தது. ஈரத்தில் மண்ணும் புல்லும் சேர்ந்து மிகவும் வழுக்கும் தன்மையுடையதாக இருந்தது. அவர் ரப்பரினால் ஆன முழங்கால் வரைக்குமான ஒரு பூட்சு அணிந்திருந்தார். யானை அசைந்து அசைந்து மெல்லச் சென்றது. யானை நடந்த பாதையின் கால் அடி அளவுக்கு யானையின் பாதம் பதிந்திருந்த அச்சு தெரிந்தது. யானையின் அதன் மீதே மற்ற அடிகளை வைத்து மெதுவாக நகர்ந்தது. யானையின் ஒவ்வொரு காலையும் தூக்கி வைக்கையில் அதன் முதுகெலும்பு அசைந்ததை அதன் மேல் உட்கார்ந்திருந்த என்னால் உணர முடிந்தது ஒருவித குற்ற உணர்ச்சியுடன். அப்போது யானையின் பாகன் யானைக்கு நிற்கவும் நடக்கவும் துதிக்கையைத் தூக்கித் துதிக்கவும் கட்டளைகளைக் கொடுத்துக் கொண்டே வந்தார். யானை நடந்து வந்து கொண்டிருக்கையில் அதனுடன் அவர் மலையாளத்தில் அதட்டல் தொனியில் பேசிக் கொண்டே வந்தார். நிற்கச் செய்ய நில்பேக் எனவும் நடக்கச்செய்ய நடபேக் எனவும் துதிக்கச் செய்ய வீரியக்(?) எனவும் கூறினார். அந்த யானையுடன் பாகன் பேசிய பேச்சு ஒரு மனிதன் தன் குடும்பத்தில் ஒருவருடன் பேசுவதைப் போல உரிமை கொண்டிருந்தது. அந்த பெண் யானைக்கும் பாகனுக்கும் என்ன உறவு. சொன்னதைச் செய்வதால் வேலைக்காரியா அல்லது அம்மனிதனுக்கு பாகன் என்ற வேலையைத் தந்ததால் முதலாளியா அல்லது பழக்கத்தினால் அன்பிற்குக் கட்டுப்பட்டு இருக்கும் தோழியா. யானையிடம் செலுத்த எத்தனைக் கட்டளைகள் உண்டு. எத்தனை வயதில் இருந்து யானைகளைப் பழக்கத்தொடங்குகிறார்கள். இந்தக் கட்டளைச் சொற்களை உருவாக்கியவர் எவர். எத்தனை ஆண்டுகளுக்கு முன். இதை இந்தப் பாகன் எவரிடமிருந்து கற்றுக் கொண்டார்.

பாகனிடம் சற்று நேரம் பேசிக் கொண்டிருந்ததில் அவர் தனக்குத் தமிழ், மலையாளம், கன்னடம், தெலுங்கு, உருது மொழிகள் தெரியுமெனவும் அங்கு யானை சவாரிக்கும் சுற்றுலாவுக்கும் வந்த மனிதர்களிடமிருந்தே அம்மொழிகளைக் கற்றுக் கொண்டதாகவும் பெருமையுடன் கூறினார். ஏனோ அவர் தனக்கு யானை மொழி தெரியும் என்பதை அவற்றுடன் சேர்த்துக் கூறவில்லை. எனக்கோ அவர் யானையிடம் பேசிய மொழி தான் வியப்பாகப் பட்டது.

மச்சம்

2010-05-31T09:27:00.000-07:00

சிறுவயதில் மச்சம் என்பது ஆச்சரியம் தரக்கூடியதாக இருந்தது. பள்ளி நாட்களில் நண்பர்களுடன் எனக்கு இவ்வளவு மச்சம் உனக்கு இவ்வளவு மச்சம் என்று எண்ணி விளையாடியதுண்டு. அந்தப் பதின்கீழ் வயதுகளில் மச்சங்களை சொத்துப் போலவே பாவித்து வந்திருக்கிறோம். மச்சங்களில் பலவகைகள் உண்டு. புள்ளி போன்றும் பொட்டுப் போன்றும் தேமல் போன்றும் பல வடிவங்கள் உண்டு. கருப்பும் உண்டு. பழுப்பும் உண்டு. மனிதர்களைப் போலவே விலங்குகளுக்கும் பறவைகளுக்கும் மச்சம் இருக்குமோ தெரியாது. இருந்தாலும் தெரியாது மயிர்ப்போர்வை மறைத்திருப்பதால். பார்க்காத இடத்தில் மச்சம் இருந்தால் அதிட்டம் என்றும் சொல்வர்.

சிறுபிராயத்தில் ஆச்சரியமாகவும் உடைமையாகவும் பெருமையின் சின்னமாக விளங்கிய மச்சம் வயது ஏற ஏற வெறும் அடையாளமாக மாறிவிடுகிறது. எனது மச்சம் முதன்முதலாக ஆவணப்படுத்தப் பட்டது நான் பத்தாம் வகுப்பு படிக்கும் போது. பத்தாம் வகுப்பு படிக்கையில் மாற்றுச் சான்றிதழில் அங்க அடையாளங்களில் இரண்டைப் பதிவு செய்வர். அப்பொழுது தான் எனது ஒரு மச்சமும் ஒரு தழும்பும் எனது தனித்த அடையாளங்களாகப் பதிவானது.

அண்மையில் ஒரு இரயில் பயணம் மச்சம் குறித்த நினைவுகளைக் கிளறி விட்டது. வார இறுதி நாள் ஒன்றில் இரவு நேரம் ஊர் திரும்பிக்கொண்டிருந்தேன். இரயில் பொதுப்பெட்டியில் பயணம். வண்டி தொலைவில் உள்ள ஊரில் இருந்து வந்ததால் கூட்டம் நிரம்பி வழிந்தது. நான் நின்று கொண்டிருந்த இடத்தில் இன்னும் ஐவர் ஒரு குழுவாக வந்திருந்தனர். அவர்களில் நால்வர் பதின்ம வயதில் இருந்தனர். ஒருவர் மட்டும் மூத்தவர். ஏறக்குறைய 30 வயதிருக்கலாம். வெளியூரில் ஏதோ தனியார் நிறுவனத்தில் வேலை செய்பவர்கள் என்பது அவர்களின் உரையாடல்களின் மூலம் தெரிந்தது. ஒவ்வொருவர் கையிலும் ஒரு சீன அல்லது கொரியத் தொலைபேசி. அதில் பாட்டும் கேட்கலாம் படமும் பார்க்கலாம். வழிநெடுக அவர்கள் பேசிக்கொண்டும் சிரித்துக் கொண்டும் பாடல்களை மாற்றி மாற்றி கேட்டுக் கொண்டும் வந்தனர். அப்போது அவர்களில் ஒருவர் மற்றொருவரின் செல்பேசியை வாங்கி பாடலை மாற்ற முயன்றார். அதனை சரிவர இயக்கத்தெரியாததால் செல்லின் சொந்தக்காரர் அதனை வாங்கி சடசடவென்று சில பொத்தான்களை அழுத்தவும் அடுத்த பாட்டு துவங்கியது. ஒலி அளவு கூடியது. பின்னர் நண்பரிடம் கொடுத்தவர் 'என்ன அண்ணா இது கூடத் தெரியாதா' எனக்கேட்டார். அதற்கு இவர் 'என்னுடைய செல்பேசியானால் எப்படி என எனக்குத் தெரியும். உன்னுடையதைப் பற்றி உனக்குத் தானே தெரியும்' என்றார். ஒருவருக்கு நெருக்கமான அல்லது சொந்தமான ஒன்றை/ஒருவரைப் பற்றிய நுணுக்கங்களோ அல்லது ரகசியங்களோ அவரவர்க்கு மட்டுமே தெரியும் என்பதற்கு ஒப்புமையாக அவர் சொன்ன வசனத்தைப் பொதுவில் சொல்லவியலாது.

குறவனும் குறத்தியும்

2010-05-20T10:15:00.001-07:00

நண்பர்களுடன் மூணாறு, இடுக்கி அணை முதலிய பகுதிகளுக்கு சுற்றுலா சென்றிருந்தேன். இடுக்கி அணையைப் பார்க்க வேண்டுமென்பதே எங்கள் முக்கிய நோக்கம். இடுக்கி அணைக்கு சாதாரண நாட்களில் அனுமதியில்லை. திருவோணத்தை ஒட்டிய ஒரு வாரமும் ஆங்கிலப் புத்தாண்டை ஒட்டிய ஒரு வாரமும் தான் பொதுமக்கள் அணையைப் பார்வையிட அனுமதிக்கப்படும் நாட்கள். நாங்கள் சென்றது திருவோணத்தையொட்டி. எந்த ஒன்றும் மறைக்கப்படும் அதை அறிந்துகொள்ள விழைவது மனித இயல்பு தானே! நாங்கள் இடுக்கி அணைக்குச் சென்றதற்கு இதுவும் ஒரு காரணமாக இருக்கலாம். மற்றொரு காரணம் இடுக்கி அணை ஆசியாவின் மிக உயரமான வளைவு அணை (Arch Dam)களுள் என்று கேள்விப்பட்டது.

காலை பத்து மணியளவில் அணையின் மேற்பகுதியை அடைந்துவிட்டோம்.. சேட்டன்மார் ஒவ்வொருவராகத் தமது குடும்பங்களுடன் வரத் தொடங்கியிருந்தனர். இடுக்கி அணை நீர்த்தேக்கம் இரு அணைகளால் உருவாக்கப்பட்டிருக்கிறது. ஒன்றின் பெயர் செறுதோணி அணை. மற்றதன் பெயர் இடுக்கி அணை. நாங்கள் சென்றது செறுதோணி அணைப்பக்கம். அங்குதான் அணையைப் பார்வையிட நுழைவுவழி உள்ளது. இடுக்கி அணையை அடைய செறுதோணி அணையைக் கடந்து ஒரு மலையைச் சுற்றி அமைந்திருக்கும் சாலையின் வழியாக இடுக்கி அணையை அடைய வேண்டும்.

இடுக்கி அணை நெருக்கமாக அமைந்த இரண்டு மலைகளுக்கு இடையே அமைந்துள்ளது. இந்த மலைகளின் பெயர்தான் குறவன் மலை, குறத்தி மலை என்பது. இம்மலைகளுக்கு இந்தப் பெயரை வைத்தவர் எவரோ? இது போல் உலகெங்கிலும் மக்கள் காடுகள் படர்ந்துள்ள மலைகளுக்கெல்லாம் பெயர் வைத்திருப்பார்களா. இம்மலைக்குப் பெயர் வைத்தவர் ஆணா பெண்ணா. அவரும் குறவரா. தனியாகப் பெயர்சூட்டு விழா நடந்திருக்குமா, மலையின் காதில் பெயரை மூன்று தடவை ஓதியிருப்பார்கள்? இத்தனை ஆயிரம் ஆண்டுகளில் இந்த மலைகளுக்கு எத்தனை பெயர்கள் இருந்திருக்கும்.

குறவன் மலைக்கும் குறத்தி மலைக்கும் என்ன உறவு. அண்ணனும் தங்கையுமா அல்லது காதலன் காதலியா அல்லது கணவனும் மனைவியுமா. என்ன காரணத்தால் ஒன்று ஆணாகவும் ஒன்று பெண்ணாகவும் பெயரிட்டவருக்குத் தோன்றியது. குறவனும் குறத்தியும் மௌனத்தினால் பேசிக்கொள்வார்களா.

எதற்காக இதற்குக் குறவன் குறத்தி என்று பெயர் வைத்தார்கள். தனக்குப் பெயர் வைக்கப்பட்டிருப்பது மலைகளுக்குத் தெரியுமா. மலைகளின் மீது பறந்து திரியும் பறவைகளும் நடந்துலவும் விலங்குகளும் இம்மலைகளுக்கு தங்கள் பங்குக்குப் பெயர் வைத்திருக்குமா. மலையில் ஏதேனும் ஒரு குருவி என்னைப் போலவே மனதில் கேள்விகளை எழுப்பியபடி பறந்து கொண்டிருக்குமா?

உறுதிமொழி

2010-05-19T09:21:00.000-07:00

ஒரு நாள் வீட்டில் உள்ள குப்பைகளை ஒழிக்கும் வேலையைச் செய்து கொண்டிருந்தேன். அப்பொழுது நீண்ட நாட்களுக்கு முன்பு எழுதிய சீட்டு ஒன்று கண்ணில் பட்டது. என்னவென்று எடுத்துப் படித்துப் பார்த்தேன். அது நான் ஒரு மாதத்தில் தொடங்க நினைத்திருந்த புதிய பழக்கங்களுக்கான உறுதிமொழி. ஒவ்வோர் ஆண்டும் தொடங்கலாம் என்றால் வருடத்தின் முதல் இரண்டு நாட்களிலேயே பழக்கத்தை விட்டுவிடுவதால் மீண்டும் அடுத்த ஆண்டு வரை காத்திருக்க வேண்டுமல்லவா. அதனாலேயே மாதக்கணக்கு. காலையில் நேரத்தில் எழுந்திருக்க வேண்டும், காலை எழுந்ததும் உடற்பயிற்சி செய்ய வேண்டும் முதலியவற்றை வரிசைப் படுத்தியிருந்தேன். இன்று வரை அவற்றை நான் பின்பற்றுவதில்லை. சரி எந்த மாதத்தில் அதை எழுதினேன் என்று பார்த்தால் மிகவும் புத்திசாலித்தனமாக மாதத்தைக் குறிப்பிடமறந்து வரும் மாதத்தில் செய்ய வேண்டியவை என்று மட்டும் தான் எழுதியிருந்தேன். எந்த மாதம் என்பது நினைவுக்கு வரவில்லை. கடந்த ஐந்தாறு மாதங்களுக்குள் தான் இருக்க வேண்டும். எவ்வளவு முயன்றும் நினைவுக்கு வரவில்லை. சரி இந்த வரும் மாதத்தின் பெயரை எழுதலாம் என்று நினைக்கையில் மற்றொரு மனது எப்படியும் இந்த மாதம் தவறிவிட்டால் அடுத்த மாதம் புதுத்தாளில் எழுதவேண்டுமே, எதற்காக ஒரு தாளை வீணாக்க வேண்டும் என்றது. சரிதான் எப்படியும் காலத்திற்கும் இருக்கப்போகிற ஆசைகள் தானே எதற்கு ஒவ்வொரு மாதமும் எழுத வேண்டும். எனவே மாதத்தின் பெயரைக் குறிப்பிடாமல் அந்தத் தாளை எடுத்து பத்திரப்படுத்தி வைத்துவிட்டேன்.

வால்பாறை பயணம்

2010-05-11T14:16:00.000-07:00

கடந்த வாரம் ஒரு விடுமுறை நாளில் நானும் எனது நண்பர்கள் மூவரும் வால்பாறை சென்று வந்தோம். வால்பாறை கோவையில் இருந்து கிட்டத்தட்ட நூறு கிலோமீட்டர் தொலைவில் உள்ளது. கோவையில் இருந்து காலை 6:30 மணியளவில் புறப்பட்டோம். கோவையில் இருந்து வால்பாறை செல்ல பொள்ளாச்சி வழியாகச் செல்ல வேண்டும். சுமார் ஒரு மணிநேரத்தில் பொள்ளாச்சியை அடைந்து அங்கே காலை உணவை முடித்துவிட்டுப் புறப்பட்டோம். பின்னர் அங்கிருந்து ஆழியாறு அணையைக் கடந்து மேற்குத் தொடர்ச்சி மலையில் வண்டி ஏறத்தொடங்கியது. மலைப்பாதையில் ஒரு கொண்டையூசி வளைவில் (19 ஆவதா அல்லது 9-ஆவதா என நினைவில்லை) வண்டியை நிறுத்தினோம். அங்கிருந்து ஆழியாறு அணை நீர்த்தேக்கம் முழுவதையும் பார்க்கலாம். அது லோம் காட்சி (Loam's view) என்றழைக்கப்படுகிறது. லோம் என்பது அங்கு பொதுப்பணித்துறையில் பணிபுரிந்த ஒரு வெள்ளைக்காரப் பொறியாளரின் பெயராம். அவ்வளைவில் மட்டும் நிறைய குரங்குகளைக் காணலாம். மக்கள் தரும் இலவசங்களை நம்பியே அவ்வளவு கூட்டம். சற்று ஏமாந்தால் வண்டியில் இருக்கும் பொருட்களை எடுத்துச் சென்று விடுவர். கோடைகாலம் ஆனாலும் ஆழியாறு அணையில் ஓரளவு நீர் இருந்தது. பின்னர் அங்கிருந்து வால்பாறையை நோக்கிப் பயணத்தைத் தொடர்ந்தோம்.

கருமலை தேயிலைத் தோட்டம் - அரங்கன் கோவில்
முதலில் கருமலைத் தேயிலைத் தோட்டத்தில் உள்ள ரங்கநாதர் கோவிலுக்குச் சென்றோம். மிகவும் அமைதியாகவும் தூய்மையாகவும் இருந்தது. அருகிலேயே ஒரு பூங்காவும் அமைத்துள்ளனர். அருகில் அனுமன் கோவிலும் உள்ளது. கோவில் முழுதும் நிறைய கண்ணாடிகளால் அலங்கரித்திருந்தது. அங்கு சென்று சாமி கும்பிட்டு விட்டு பின்னர் நீராறு அணைக்குப் பயணத்தைத் தொடங்கினோம்.

நீராறு அணை
நீராறு அணை ஏறத்தாழ பத்து கிலோமீட்டர் தொலைவில் உள்ளது. அங்கு சென்றோம். பொதுப் போக்குவரத்து வசதிகள் இல்லாததால் அங்கும் கூட்டம் குறைவாகவே இருந்தது. அழகிய அணை. அணை மீது நடந்து செல்ல அனுமதிக்கிறார்கள். அணையின் மறுபக்கம் மலையை ஒட்டிய பகுதியில் நிறையப் பறவைகள் பாடிக்கொண்டிருந்தன. அங்கு நான் சிவப்புமீசைச் சின்னான் எனப்படும் (Red Whiskered Bulbul) பறவையை அருகில் பார்த்தேன். காட்டுப்பகுதியும் மனிதர்கள் நடமாட்டம் குறைந்த பகுதியும் ஆதலால் அப்பறவை அஞ்சாமல் அங்கேயே வெகுநேரம் அமர்ந்திருந்தது. இப்பறவைக்கு கன்னத்தின் இருபக்கமும் சிவப்பு நிறமாக இருக்கும் அதனாலேயே இப்பெயர். தலைமீது முக்கோண வடிவத்தில் அழகான கொண்டை ஒன்றும் இருக்கும். மிகச்சிறிய வாயும் அலகும். அப்பகுதி முழுதும் இப்பறவையும் மைனாவும் மிக அதிகமாக இருந்தன.

சோலையாறு அணை
பின்னர் மதியம் வால்பாறை திரும்பி மதிய உணவை முடித்தோம். கடைவீதியில் உள்ள ஒரு கடையில். மிகுந்த கூட்டம். பின்னர் புறப்பட்டு சோலையாறு அணையை அடைந்தோம். அங்கு சில வீடுகளும் கடைகளும் கூட இருந்தன. சோலையாறு அணையின் நீர்ப்பிடிப்புப் பகுதி மிகவும் நீளமானது. கோடை காலம் என்பதால் நீர் குறைவாகவே இருந்தது. ஒரு மணிநேரம் அணையைச் சுற்றிப்பார்த்து விட்டு பின்னர் கோவை திரும்பினோம்.

சோலைக் காடுகளில் இரு நாட்கள் - பகுதி 3

2010-05-10T11:51:00.000-07:00

மூணாறிலிருந்து மறுநாள் காலை இடுக்கிக்கு புறப்பட்டோம். காலை ஏழு மணிக்கும் மிகுந்த பனி மூட்டமாக இருந்தது. மூணாறில் இருந்து இடுக்கி செல்லும் பாதை மிகவும் ரம்மியமானது. மலைப் பாதை, இருபுறமும் பசுமையான மரங்களும் தேயிலைத் தோட்டங்களும். மூணாறை விட்டு விலக விலக தேயிலைத் தோட்டங்கள் மறைந்து அழகான மழைக்காடுகள் தென்பட்டன. சில நீர்நிலைகள், அணைகள், பாலங்கள். இடுக்கிக்கு அருகே சென்று அங்கு ஒரு ஊரில் காலை உணவு உண்டோம். சற்று நேரம்தாழ்ந்து சென்றதால், புரோட்டா மட்டுமே இருந்தது. அன்றுதான் முதன்முதலாக காலையில் புரோட்டா சாப்பிட்டது. பின்னர் பாலில்லா தேனீர் குடித்தேன். அங்கிருந்து புறப்பட்டு இடுக்கி அணையை அடைந்தோம். முதலில் இடுக்கி அணையின் கீழ்ப்பக்கம் சென்று பார்த்தோம். அணை நன்றாகத் தெரிவதற்காக அணையின் முன்பக்கம் ஒரு பரந்த திடல் போன்று இடத்தைக் காலியாக விட்டுள்ளனர். அணையின் முன்னால் சில வீடுகள் இருந்தன. அணையின் உயரம் 500 அடிகளுக்கு மேல். அணையின் மறுபுறம் எப்படியும் நூறு இருநூறு அடி வரை தண்ணீர் நின்றிருக்கலாம். நடுவில் ஒரு வளைந்த சுவர்!

அங்கு சிறுது நேரம் இருந்து விட்டு அணையின் மேற்புறம் சென்றோம். இந்த நீர்த்தேக்கம் இரண்டு அணைகளால் ஆக்கப்பட்டுள்ளது. ஒரு புறம் செறுதோணி என்னும் நேரணை. மறுபுறம் புகழ்பெற்ற இடுக்கி வளைவு அணை. நடந்து செல்லும் போது செறுதோணி அணையைக் கடந்து பின்னர் இடுக்கி அணையின் மீது செல்ல வேண்டும். இத்தகைய வளைவு அணைகள் இடைவெளி குறைவாக இருக்கும் மலைகளுக்கு இடையே தான் கட்டப்படும். இடுக்கி அணை கட்டப்பட்டிருக்கும் மலைகளுக்குப் பெயர் குறவன் மலை, குறத்தி மலை! மலையில் ஆணையும் பெண்ணையும் கண்டறிவது எப்படியோ? அங்கு முற்காலத்தில் வாழ்ந்த மக்கள் இயற்கையுடன் எவ்வளவு இயைந்து இருந்தனர் என்பது மலைக்குப் பெயர் இட்டதில் இருந்து தெரிந்து கொள்ளலாம். இரு மலைகளில் ஒன்றில் கைவிடப்பட்ட சிறு குகை ஒன்று உள்ளது. மற்றொன்று பயன்பாட்டில் உள்ளது. அதனுள் சென்று மலையில் இருந்து இறங்கி விடலாம். அந்த குகைக்கு மறுபுறம் இளநீர் விற்றுக்கொண்டிருந்தனர். இளநீர் பத்துரூபாய்க்கு விற்றது. ஒரு நூறு அடிக்கு இந்தப்புறம் கடல் போல் நீர் நின்று கொண்டிருந்தது. அப்போது தான் ஒரு புகழ்பெற்ற ஆங்கில வாசகம் நினைவுக்கு வந்தது "Water, water, everwhere water, but no water to drink". வாக்கியம் நினைவில் இருக்கும் அளவிற்கு இதைச் சொன்னவர் பெயர் நினைவில் இல்லை. இது சொல்லப்பட்டது கடலில் இருக்கும் போதென்றாலும் எங்களுக்கும் தண்ணீர் எட்டவில்லையல்லவா.

பின்னர் வந்தவழியில் திரும்பி வந்தோம். அங்கு ஒரு மலையில் உயரத்தில் ஒரு சிறுபூங்காவும் காட்சிமுனையும் இருந்தது. அங்கு சென்று அணையின் முழுப்பரப்பையும் பார்த்தோம். நீர் சிறுசிறு மலைகளை விழுங்கி நின்று கொண்டிருந்தது. அவ்வளவு நீரைத் தடுத்து நிறுத்தும் அம்மாபெரும் அணையைக் கட்டிய மனிதர்களின் பொறியியல் நுட்பத்தையும் திட்டத்தைச் உருப்பெறச் செய்த துணிச்சலையும் வியந்து போற்றித் திரும்பினோம்.

மாதம் ஒரு பிள்ளை

2010-04-15T12:36:00.000-07:00

ஆணோ பெண்ணோ
கருப்போ சிவப்போ
மாதம் ஒரு பிள்ளை
பெற்றெடுக்கிறது
ஊர்க் குப்பைத்தொட்டி

சோலைக் காடுகளில் இருநாட்கள் - பகுதி 2

2010-04-15T12:33:00.001-07:00

உடுமலையில் இருந்து மூணாறு செல்லும் சின்னாறு முதலான காப்புக்காடுகளில் இரண்டு அருவிகள் உள்ளன. முதலாவது ஆகாயகங்கை என்னும் அருவி. இது நெடுஞ்சாலையில் இருந்து ஒரு கிலோமீட்டர் தொலைவில் பள்ளத்தாக்கில் உள்ளது. அங்கு செல்ல காட்டிலாகா வழிகாட்டி ஒருவருடன் தான் செல்ல வேண்டுமாம். நாங்கள் அங்கு செல்ல வில்லை. அடுத்த அருவி இலக்கோம் அருவி என்றழைக்கப்படும் அருவி. இது நெடுஞ்சாலையை ஒட்டியே உள்ளது. உயரம் குறைவெனினும் நல்ல நீரோட்டம் கொண்ட அகலமான அருவி. நீரின் வேகம் அதிகமாக இருப்பதாலும் பாறைகள் மிகுந்திருப்பதாலும் அருகில் சென்று குளிக்க இயலாது. அங்கு சிறிது நேரம் இருந்துவிட்டு புறப்பட்டோம். அங்கு ஒரு அழகிய பறவையைக் கண்டேன். புகைப்படமும் எடுத்தோம். பின்னர் திரும்பி வந்த பின் இணையத்தில் தேடியபின் தெரிந்தது அது சாம்பல்நிற வாலாட்டிக்குருவி (Grey Wagtail) என்னும் பறவை என. அங்கிருந்து சிறிது நேரப் பயணத்தில் தேயிலைத் தோட்டங்கள் எம்மை வரவேற்கத் தொடங்கிவிட்டன.

காரில் சென்றதால் ஆங்காங்கு வண்டியை நிறுத்தி மலைகளையும் பள்ளத்தாக்குகளையும் இரசித்துக் கொண்டே சென்றோம். வழிநெடுக தேயிலைத் தோட்டங்கள். பெண்கள் உடலைச் சுற்றி பாலித்தீன் பைகளைக் கட்டிக்கொண்டும் தலையில் பையை மாட்டிக் கொண்டும் தேயிலை பறித்துக் கொண்டிருந்தனர். அங்கு ஒரு மரநிழலில் ஒருவர் ஆங்கிலேயர் காலத்துத் துரை போல டிரவுசரும் தொப்பியும் கால் பூட்டுமாக பெண்கள் கொண்டு வரும் தேயிலையை எடைபோட்டுக் குறித்துக் கொண்டிருந்தார். வழிகளில் சிறுவர்கள் நின்று கொண்டு கொய்யாப்பழம் விற்றுக் கொண்டிருந்தனர். அவ்வாறு நின்று கொண்டிருந்த இரு சிறுவர்களிடம் நாங்கள் கொஞ்சம் பழங்கள் வாங்கினோம். தமிழ் பேசினர். விசாரித்ததில் சங்கரன்கோவல் பக்கம் அவர்கள் சொந்த ஊர் எனத்தெரிந்தது. தேயிலைத் தோட்டங்களில் நிறையத் தமிழர்கள் வேலை செய்கின்றனர். தேயிலைகளுக்கும் பூச்சிமருந்து அடிக்கப்படுகிறது என்னும் உண்மையை நான் அன்றுதான் கண்டுகொண்டேன். தேனீர்ப் பிரியனான எனக்கு இது ஒரு அதிர்ச்சியான காட்சி. இருந்தாலும் நான் தேனீர் குடிப்பதை விட்டுவிடவில்லை. அல்லது விட முடிய வில்லை. எனினும் குடிக்கும் அளவை குறைத்துக் கொண்டுள்ளேன். இன்னும் குறைக்க வேண்டும், குடிப்பதை விடும் வரை. தேயிலைச் செடியின் பூவைக் கண்டதும் இங்குதான். வெண்ணிறத்தில் இருக்கிறது.

தொடர்ந்து நாங்கள் சென்று உச்சிப்பொழுதில் மூணாறை அடைந்து விட்டோம். அங்கிருந்து மாட்டுப்பட்டி அணைக்குச் செல்ல முடிவு செய்து புறப்பட்டோம். அணைக்குச் சென்று சிறிது நேரம் பொழுதுபோக்கி விட்டு மற்றொரு சிறிய அணைக்குச் சென்றோம். நண்பர்கள் அங்கு குதிரைசவாரி செய்தனர். அங்கு சில பெட்டிக்கடைகள் இருந்தன. பசி அதிகமாகிக் கொண்டே இருந்ததால் அங்கு ஒரு கடையில் நூடுல்சு வாங்கிச் சாப்பிட்டுவிட்டு பின்னர் மீண்டும் மூணாறு நகரை நோக்கித் திரும்பினோம். திரும்பி வரும் வழியில் ஓரிடத்தில் யானை சவாரி நிகழ்ந்து கொண்டிருந்தது. நாங்களும் யானைச் சவாரி செய்தோம். யானை மீது நாம் ஏறுவதற்காக சிறு மேடை அமைத்திருக்கிறார்கள். யானைமீது பெரிய துணி போன்று போர்த்தி அதன் மீது ஒரு இரும்புச்சட்டத்தை வைத்து நாம் உட்கார இருக்கை செய்திருக்கின்றனர். யானைகளுடன் அதன் பாகனும் கூடவே நடந்து வருகிறார். வரும்பொழுது யானையுடன் பேசிக்கொண்டே வருகிறார். நம் பயணத்தின் நடுவழியில் யானையை நிறுத்தி நம்மிடமிருந்து புகைப்படக் கருவியை வாங்கி படமெடுத்துத் தருகிறார். பாகன் யானையுடன் ஒரு தனிமொழியில் பேசுகிறார். அது தமிழும் மலையாளமும் கன்னடமும் கலந்த கலவையாகத் தெரிந்தது. யானையை நடக்கச் சொல்ல நடபேக் என்கிறார். உடன் யானையும் புரிந்து கொண்டு நடக்கிறது. நிற்கச்சொன்னால் நிற்கிறது. துதிக்கையைத் தூக்குகிறது. பாகன் யானையிடம் ஏதோ சொல்கிறார். யானையின் முகபாவங்களைப் பார்த்துப் புரிந்து கொண்டு மறுமொழி சொல்கிறார். யானைக்கும் பாகனுக்கும் உள்ள உறவு கொஞ்சம் நுட்பமானதாகத் தான் இருக்கவேண்டும். இல்லாவிடில் இவ்வாறு ஒருவருக்கொருவர் புரிந்து கொண்டு நடப்பதெப்படி? நான் சென்ற யானையின் பெயர் யமுனா. யானையின் பாகனும் ஒரு தமிழரே. நாங்கள் தமிழ் பேசுவதைக் கண்டு ஆர்வமுடன் நாங்கள் எந்த ஊர், என்ன வேலை என ஆர்வத்துடன் விசாரித்தார். தான் திருநெல்வேலியைச் சேர்ந்தவர் என்றும் தாம் சிறுவனாக வந்து யானைப்பாகனாக பயிற்சி பெற்றதாகவும் தென்னிந்திய மொழிகள் நான்கு அரபி உட்பட ஐந்து மொழிகள் தெரியுமென்றும் கூறினார். யானைமொழியையும் சேர்த்தால் ஆறு!

பின்னர் மாலை ஊருக்குள் வந்து ஒரு இடத்தில் தங்குவிடுதி ஒன்றில் அறை எடுத்துத் தங்கினோம். மறுநாள் காலை இடுக்கி அணைக்கு.

தொடரும்...

நாமக்கல் பயணம்

2010-04-15T10:14:00.000-07:00

இந்த ஆண்டு சித்திரை முதல் நாள் நாமக்கல் சென்றிருந்தேன். நாமக்கல்லில் உள்ள ஆஞ்சநேயர் கோவிலுக்குச் சென்று வரவே இப்பயணம். ஈரோட்டில் இருந்து திருச்செங்கோடு வழியாக நாமக்கல் சென்றோம். பேருந்துப் பயணம். திருச்செங்கோட்டில் இருந்து நாமக்கல் செல்லும் வரை சாலையின் இருபுறமும் நிலம் தரிசாகக் கிடந்தது. மிகுந்த வெப்பக்காற்று வீசியது. முளைத்திருந்த புற்கள் கூட பசுமையிழந்து வெயிலின் நிறத்தில் இருந்தன. பார்த்தவரையில் அச்சாலையோரத்தில் ஒரேயோர் இடத்தைத் தவிர மற்ற இடங்களில் மழைநீர் சேகரிக்கும் ஏரி, குளம், குட்டைகளைக் காணவில்லை. சிவகங்கை மாவட்டத்தில் உள்ளது போல் இங்கும் கண்மாய்கள், குளங்கள் போன்றன ஏற்படுத்தப்பட்டால் இப்பகுதியிலும் பசுமை தழைக்கலாம்.

பேருந்தில் சேலம் சாலை சந்திப்பில் இறங்கி பின்னர் சேலம் சாலைக்கு எதிர்ப்புறம் செல்லும் சாலையில் நடக்கத் தொடங்கினோம். ஐந்து நிமிட நடைக்குப் பின் நரசிம்மர் கோவிலை அடைந்தோம். கோவில் மலையின் அடிவாரத்தில் அமைந்துள்ளது. மலை எனில் மரங்கள் அற்ற மொட்டைப்பாறை. மலையின் மேலே ஒரு கோட்டையும் உள்ளது. தமிழில் கல் என்றால் மலை என்றும் ஒரு பொருள் உண்டு. இம்மலையைத் தொட்டே இவ்வூரின் பெயர் நாமக்கல் என்றழைக்கப்படுகிறது போலும்! இதே போல் மற்றொரு ஊரான திண்டுக்கல்லையும் ஒப்புநோக்கலாம். அங்கும் ஒரு மலையும் அதன்மேல் ஒரு கோட்டையும் உண்டாம். கோடு என்பதும் மலை எனும் பொருள் தரும். எடுத்துக்காட்டு - திருச்செங்கோடு. திருச்செங்கோட்டில் ஒரு மலையும் மலை மீது அர்த்த நாரீசுவரர் கோவிலும் உள்ளது.

கோவில் தொல்பொருள்துறையின் கட்டுப்பாட்டில் உள்ளதாக அறிவித்த பலகையைக் கடந்து, நரசிம்மர் கோவில் பிரகாரத்தினுள் சென்று முதலில் நாமகிரித் தாயாரைக் கண்டு வணங்கினோம். பின்னர் நரசிம்மர் ஆலயத்திற்குச் சென்றோம். உள்ளே நரசிம்மர் அழகாகப் பெரிதாக அமர்ந்திருந்தார். கோவிலின் கருவறைக்குள்ளேயே நம்மை அனுமதிக்கிறார்கள். உள்ளே சென்றதும்தான் தெரிந்தது அது ஒரு குடைவரைக் கோவில் என்பது. கருவறையில் வாயிலுக்கு நேர்எதிரே நரசிம்மரின் புடைப்புச்சிற்பம் உள்ளது. உள்ளே நுழைந்ததும் இடப்பக்கம் திருமால் ஆதிசேசன் மீது அமர்ந்திருக்கும் காட்சி செதுக்கப்பட்டுள்ளது. இது போல் அரவத்தின் மீது மாலன் அமர்ந்திருக்கும் சிற்பத்தைக் கண்டது இங்குதான். இக்கோவிலுக்குச் சென்றதும் இதுவே முதல் முறை. பெரிய நரசிம்மர் சிலைக்கு இடது புறம், மற்றொரு நரசிம்மர் சிற்பம் உள்ளது. ஆனால் இது அரக்கனின் வயிற்றைக் கிழிப்பது போன்ற காட்சியாகும். கருவறையின் உள்ள நுழைந்தவுடன் வலப்புறம் ஒற்றைக்காலைத் தூக்கி ஒருகாலில் நிற்கும் உலகளந்த பெருமாளின் சிற்பம் உள்ளது. நரசிம்மரின் வலதுபுறமும் ஒரு சிலை உள்ளது. அதனைச் சரியாகப் பார்க்கவியலவில்லை. உள்ள புடைப்புச்சிற்பங்கள் அனைத்தும் மிகவும் அழகாக ஓவியம் போலச் செதுக்கப்பட்டுள்ளன. அதன் மீது நம் மக்களும் சிறிது அழகு கூட்டியுள்ளனர். எவ்வாறெனில் கண்ணுக்கு வெள்ளை நாமமும் உதட்டுக்கு செந்தூரமும் பூசியுள்ளது ஓவியம் வரைந்தது போன்ற அழகைக் கொடுத்தது. அவற்றைப் பார்த்து விட்டு வெளியே மண்டபத்தில் வந்தமர்ந்தோம். கொண்டு போயிருந்த கட்டுச்சோற்றைப் (புளிச்சோறு) பிரித்துச் சாப்பிட்டோம். தண்ணீர் கொண்டுபோயிருந்தது நல்லதாகப் போயிற்று. கோவிலுள் தண்ணீர் கிடைக்கவில்லை.

கோவிலைப் பற்றி குறிப்பிட வேண்டிய மற்றொரு செய்தி, சிறப்புக் கட்டண வழி இல்லை. கோவில் தொல்பொருள் துறையின் கட்டுப்பாட்டில் உள்ளதாலோ என்னவோ. நானறிந்த வரை, பெரும்பாலான கோவில்களில் சிறப்புக் கட்டணவழி உண்டு. பின்னர் எதிரில் 100 அடி தொலைவில் இருந்த ஆஞ்சநேயர் நரசிம்மரைப் பார்த்து வணங்கி நிற்கிறார். உயரமான சிலை. 15 - 20 அடி உயரம் இருக்கும். சிலை இருந்த இடத்தின் மேற்பகுதிக்கு கூரை போடாமல் விட்டிருக்கிறார்கள். சிலை உயரமாக இருப்பதால். பின்னர் பேருந்து நிலையத்திற்கு நடந்து சென்று (10 - 15 நிமிட நடை) அங்கிருந்து பேருந்து பிடித்து ஊர் திரும்பினோம்.

கொசுறுச் செய்தி.
கோவிலுக்குச் செல்லும் வழியில் கோவிலுக்கு அருகில் அன்றுதான் பனங்காடை (Indian Roller) எனப்படும் பறவையை அருகில் பார்த்தேன். பத்து இருபது அடி தொலைவில். இவ்வளவு அருகில் அப்பறவையைப் பார்த்தது அதுவே முதல்முறை. இப்பறவை நீலமும் பழுப்பும் கலந்த நிறத்தில் மைனாவை விடச்சற்று பெரிதாக இருக்கும். பெரும்பாலும் தனியாகவே இருக்கும். மின்சார, தொலைபேசிக்கம்பிகளின் மீது அமர்ந்திருக்கக் காணலாம்.
நாமக்கல் கோட்டைக்கு இம்முறை போகவில்லை. மறுமுறை நாமக்கல் செல்கையில் கட்டாயம் மலையேறி கோட்டையைப் பார்த்து வர வேண்டும்.

கதிரொளி அறுவடை

2010-04-12T09:02:00.000-07:00

இன்று ஆங்கில நாளிதழில் ஒரு செய்தி படித்தேன். அதாவது தென்தமிழகத்தில் உள்ள ஒரு பொறியியல் கல்லூரியில் சூரிய ஒளியில் உணவு சமைக்கும் கலன் ஒன்று நிறுவப்பட்டுள்ளது. இது அக்கல்லூரி விடுதியில் படிக்கும் 1500 மாணவர்களுக்கு உணவு தயாரிக்கப் பயன்படுத்தப்படும் என்றும் இதன் மூலம் 40 சதவீதம் சமையல் எரிவாயு மிச்சமாகும் என்றும் குறிப்பிடப்பட்டிருந்தது.

எரிபொருள் தட்டுப்பாடு, எரிபொருள் விலை உயர்வு என்றிருக்கும் இச்சமயத்தில் இது போன்ற செயல்கள் கட்டாயம் பாராட்டப்பட வேண்டும். இது சமைப்பதற்கான எரிபொருள் தேவையில் இருந்து ஓரளவு விடுதலை கொடுத்து தற்சார்பு அடைய உதவும். சூரிய ஒளியை நல்ல திறனுடன் பயன்படுத்த வாகாக அமைந்துள்ள பகுதிகளுள் தமிழகமும் ஒன்று.

எங்கெல்லாம் நூற்றுக்கணக்காருக்காக உணவு சமைக்க வேண்டியுள்ளதோ அங்கு இக்கலன்கள் நல்ல பயன்கொடுக்கும். இதற்கு அரசு மானியமும் ஒன்று. இது போன்று இந்தியாவில் பிரம்மகுமாரிகள் அமைப்பு இராசத்தானிலும் திருப்பதி திருமலையிலும் அமைக்கப்பட்டுள்ளன.

இதனைப் பின்பற்றி தமிழகத்தில் உள்ள மற்ற கல்லூரிகள், உணவகங்கள் போன்றவையும் சூரிய ஒளிக் கலன்களைப் பொருத்தலாம். உள்ளூர் மக்களுக்கு இதனால் வேலை கொடுத்த மாதிரியும் இருக்கும் (கலன்கள் அமைக்க), சுற்றுச்சூழலை மாசுபடுத்தாத மாதிரியும் இருக்கும், பணத்தை மிச்சப்படுத்திய மாதிரியும் இருக்கும்.

நெல்லின் கதிர் அறுத்து கதிரின் ஒளி அறுத்து சோறு சமைப்போம்.

இந்து நாளிதழ் செய்தி: http://www.hindu.com/2010/04/07/stories/2010040758030800.htm

வாலாங்குளம் - குளக்கரையில் ஒரு நடை

2010-03-29T12:59:00.001-07:00

கடந்த வாரத்தில் ஒரு நாள் மாலை வாலாங்குளத்தின் கரையில் ஒரு நடை சென்று வந்தேன். சூரியன் மெதுவாக இறங்கிக் கொண்டிருந்தது. குளத்தின் பெரும்பகுதியை ஆகாயத்தாமரை நிறைந்திருந்தது. ஆகாயத்தாமரை ஈசல் போன்று சட்டெனப் பெருகி விடுகிறது. இச்செடிகளின் ஊடே சில ஊதா நிறக் கோழி (Purple Moorhen) போன்ற பறவைகள் மேய்ந்து கொண்டிருந்தன. நம்மைக் கண்டவுடன் இலைகளுக்குள் சென்று மறைந்து விடுகின்றன.

கடந்த இரு மாதங்களுக்கு முன்னர் குளம் வறண்டு பின்னர் நீர் வந்து நிறைந்த போது இத்தாவரங்கள் ஒன்றிரண்டே இருந்தன. இரண்டு மாதங்களில் கிட்டத்தட்ட முக்கால் பங்கு பரப்பை மூடி விட்டன. நாமக்கோழிகள் சில நீரில் நீந்திக் கொண்டிருந்தன. அருகில் சென்றபோது படபடவென இறக்கைகளை அடித்துக் கொண்டு குளத்தின் நடுப்பகுதிக்குச் சென்று விட்டன. கடந்த இரு வருடங்களில் இம்முறை தான் அதாவது இருமாதங்களுக்கு முன் கூழைக்கடாப் பறவையை (Pelican) இக்குளத்தில் முதன்முறையாகப் பார்த்தேன். இவற்றை உக்கடம் பெரியகுளத்திலும் சிங்காநல்லூர்க் குளத்திலும் முன்பே பார்த்துள்ளேன். காலை வேளையில் படகுபோல் அவை அமைதியாக நீந்திச் செல்லும் அழகே தனி. கீழ்த்தாடையில் பை போன்ற அமைப்பைக் கொண்ட இப்பறவைகள் மீன்களைப் பிடித்து உண்பதைப் பார்ப்பதற்கே வித்தியாசமாக இருக்கும்.

வாலாங்குளத்தின் கரை மீது ஒரு சாலை செல்கிறது. இச்சாலை சுங்கம், உக்கடம் ஆகிய பகுதிகளை இணைக்கிறது. இரயில்வே மேம்பாலமும் இதன் ஒரு பகுதி. குளக்கரையில் வனத்துறையினர் மரங்களை நட்டுள்ளனர். அவற்றில் தூங்குமூஞ்சி மரங்களும் வேப்ப மரங்களும் அடங்கும். குறிப்பிட்ட சதவீத மரங்கள் அழிந்து விட்டன. சரக்குந்துகளில் நிறைய கட்டிடக் கழிவுகளைக் கொண்டு வந்து இதன் கரையில் கொட்டுகின்றனர். இதனால் மரங்கள் இவற்றால் மூடப்பட்டும் இவ்வண்டிகள் ஏறியும் அழிகின்றன. எனினும் தற்போது கரைகளில் நூறில் இருந்து நூற்றைம்பது மரங்கள் வரை இருக்கும். இவை இப்போது ஓரளவுக்கு வளர்ந்து விட்டன. பாதி மரங்கள் ஆறு - ஏழு அடி உயரம் வரை வளர்ந்து விட்டன.

வாலாங்குளக் கரையில் உள்ள சாலையில் வாகனங்கள் குளத்தையும் குளத்தில் உள்ள பறவைகளையும் சட்டைசெய்யாமல் தமது வழிபார்த்து வேகமாக விரைந்து கொண்டிருந்தன. மரங்களும் பறவைகளும் கூட மனிதர்களை இலட்சியம் செய்யாது தம் பாட்டிற்கு இயங்கிக் கொண்டிருந்தன. சூரியன் சிவப்பேறி இறங்கிக் கொண்டிருந்தது.

அமைதியாக ஒரு மாற்றம்

2010-02-02T10:23:00.000-08:00

அண்மைக் காலமாக எழுத்து ஊடகங்களில் நேர்மறையான நல்ல பல செய்திகள் வருவதைக் கண்டு மகிழ்ச்சியாக இருக்கிறது. மூன்று ஆண்டுகளுக்கு முன்பு தொடங்கப்பட்ட பசுமை விகடன், கடந்த ஆண்டு துவங்கிய புதிய தலைமுறை ஆகிய இதழ்கள் நல்ல நிகழ்வுகளையும் செய்திகளையும் வெளியிடுகின்றன. பொதுவாக அச்சு ஊடகங்களில் கொலை, கொள்ளையை முதன்மைப் படுத்தும் நாளிதழ்கள், சினிமாவையும் நடிகர்களையும் முன்னிலைப்படடுத்தும் வார, மாத இதழ்கள், குறுகிய வாசகப்பரப்பினைக் கொண்ட தீவிர இலக்கிய இதழ்கள் அதிகம் இருக்கும் தமிழ் அச்சு ஊடகப் பரப்பில் இந்த புதிய வரவுகள் மகிழ்ச்சி அளிப்பதாக உள்ளது.

மேற்கூறிய இரு இதழ்களிலும் கடந்த நாட்களில் படித்த நான்கைந்து நல்ல செய்திகள், மக்களின் கூட்டு முயற்சியில் செய்யப்பட்ட நற்பணிகளை பகிர்ந்து கொள்வதே இக்கட்டுரையின் நோக்கம்.

* செய்தி ஒன்று. ஒரு அரசுப்பள்ளிக்கு அதன் முன்னாள் மாணவர்கள் ஒன்று சேர்ந்து நல்ல தரம் வாய்ந்த நூலகத்தைக் கட்டி நல்ல புத்தகங்கள், கணினி வசதி செய்து கொடுத்துள்ளனர். மாலை நேரங்களில் ஊர்ப்பொதுமக்களும் நூலகத்தைப் பயன்படுத்திக் கொள்ளலாம்.

* செய்தி இரண்டு. மாவட்ட ஆட்சித் தலைவர் வள்ளலார், தனது மாவட்டத்தில் உள்ள ஏரி, குளங்களை அரசின் பழமையான கோப்புகள், அவ்வூரில் உள்ள முதியோர்கள் உதவியுடன் கண்டறிந்து, அக்குளங்களை இணைக்கும் கால்வாய்களையும் கண்டறிகிறார். இவற்றில் பல மூடப்பட்டு தூர்ந்து போய் இருப்பதால் அரசின் கிராம மக்கள் வேலைவாய்ப்பத் திட்டத்தின் கீழ் ஏரி, குளங்களை மீட்டு ஆழப்படுத்தவும், வாய்க்கால்களை இணைக்கவும் வழிவகை செய்கிறார்.

* செய்தி மூன்று. ஒரு தலைமை ஆசிரியர் பள்ளி மாணவர்களுக்கு உலக வெப்பமயமாதல் பற்றிய விழிப்புணர்வை ஊட்டி மாணவர்களை பள்ளியிலும் வெளியிலும் மரம் வளர்க்க ஊக்குவிக்கிறார்.

* செய்தி நான்கு. நாமக்கல் மாவட்ட ஆட்சியர் சகாயம் அவர்கள் வறண்ட அம்மாவட்டத்தின் பசுமைப் பரப்பை அதிகரிக்க இலட்சக்கணக்கான மரங்களை நட்டு வளர்க்க வேண்டுமென திட்டமிட்டு செயலாற்றி வருகிறார்.

* செய்தி ஐந்து. புதுக்கோட்டை மாவட்டத்தில் உள்ள ஒரு துவக்கப்பள்ளி ஆசிரியர் தனது சொந்த முயற்சியில் இணைய இணைப்புப் பெற்று தம் மாணவர்கள் இணைய வழியில் தகவல்களை அறிந்திடப் பணி செய்து வருகிறார்.

நாடெங்கிலும் அமைதியாக தனி மனிதர்களாலும், சிறு குழுக்களாலும் கல்வி, சூழல், வேளாண்மை, வறுமை ஒழிப்பு, லஞ்ச எதிர்ப்பு முதலிய பல்வேறு துறைகளிலும் நல்ல மாற்றங்கள் நிகழ்ந்து கொண்டிருக்கின்றன. இதனை அறிந்து மற்ற நல்லெண்ணம் படைத்தோரும் இது போன்ற பின்பற்றி நல்ல மாற்றங்களை ஏற்படுத்த வேண்டும்.

இது போல் நான் படிக்கும், கேட்கும் நல்ல செய்திகளைத் தொகுக்க எண்ணியுள்ளேன்.

அமைதிப் பள்ளத்தாக்கு - ஒரு பயணம்

2010-01-18T09:02:00.000-08:00

அலுவலக நண்பர்களுடன் நான் அமைதிப் பள்ளத்தாக்குக்கு (Silent Valley) ஒரு நாள் பயணம் சென்றேன். கோவையில் இருந்து முக்காலி என்னும் இடம் வரை நாங்கள் வாடகைக்கு எடுத்திருந்த பேருந்திலும் அங்கிருந்து காட்டின் உட்பகுதிக்கு கேரள வனத்துறைக் கட்டுப்பாட்டில் உள்ள சீப்பிலும் (Jeep) சென்றோம். முக்காலி என்பது அமைதிப்பள்ளத்தாக்கின் எல்லைப் பகுதி. அங்கு தான் கேரளவனத்துறையின் அலுவலகம் உள்ளது.

முக்காலி நமது வண்டிகளில் செல்லலாம். அங்கிருந்து வனத்துறை அனுமதி பெற்ற வண்டிகளில் தான் செல்ல வேண்டும். அச்சாலை தார் பூசாத சல்லிக்கற்களால் ஆன சாலை. முதுகெலும்பு வலுவாக இல்லையெனில் சில நாட்களுக்காவது சிக்கல்தான். காடு இரு பகுதிகளாக உள்ளது. ஒன்று core zone எனப்படும் அடர்காடு. மற்றது buffer zone எனப்படும் பாதுகாக்கப்பட்ட வெளிவட்டக்காடு.

உள்ளே மேடான ஒரு இடத்தில் காட்சிகோபுரம் ஒன்றுள்ளது. நம்மை அழைத்துச்சென்ற வண்டி நம்மை அங்கே இறக்கி விட்டுவிடும். காட்சிக் கோபுரத்தின் மீதேறி காட்டையும் மலைகளையும் ஓடும் ஆற்றையும் பார்வையிட்டோம். சனவரியில் பூக்கள் பூத்து பார்ப்பதற்கோ அற்புதமாக இருக்குமென்றார்கள்.

இப்பகுதிக்குள் குந்திப்புழா என்றொரு ஆறு ஓடுகிறது. காட்சிக்கோபுரம் உள்ள இடத்திலிருந்து மண்பாதையில் ஒன்றிரண்டு கிலோமீட்டர் நடந்து கீழே ஓடும் ஆற்றின் கரையை அடையலாம். வேலிபோட்டுத் தடுத்து வைத்துள்ளனர். சுற்றுலாப் பயணிகள் நீரில் இறங்க அனுமதி இல்லை. ஆற்றின் மீது ஒரு நடைப்பாலமும் உள்ளது. எனினும் அது வலுவாக இல்லாததால் அதில் நடக்கவும் ஆற்றைக் கடக்கவும் அனுமதி இல்லை. எனினும் சென்றதற்கு அடையாளமாக நாங்கள் பாலத்தின் வாயிலில் நின்று புகைப்படம் எடுத்துக் கொண்டோம்.

திரும்பி வருகையில் சாலையோரத்தில் உள்ள ஒரு மரத்தில் ஒரு மலையணிலை ஓட்டுனர் காட்டினார். சில சோலை மந்திகளையும் பார்த்தோம். சோலை மந்திக் கூட்டத்தை விட எங்கள் கூட்டம் அதிகமாகவே இருந்தது. எங்கள் சத்தத்தினால் அவை கலைந்து காட்டுக்குள் சென்றுவிட்டன.

குறைவான தூக்கமும் மாரடைப்பும்

2009-11-19T14:01:00.000-08:00

நண்பர் ஒருவரின் Forward செய்யப்பட்ட மின்மடலில் இருந்து.
குறைவான தூக்கம் மாரடைப்பு வருவதற்கான காரணங்களில் ஒன்றாக கண்டறியப்பட்டிருக்கிறதாம். குறைந்தது 6 முதல் 8 மணிநேரத்தூக்கம் பரிந்துரைக்கப்படுகிறது.

குறைவான தூக்கத்தினால் ஏற்படும் சிக்கல்களாகக் கூறப்படுபவை
* இரத்த அழுத்தம் அதிகமாகும்
* கவனக்குறைவு
* பகலில் சோம்பல்
* குருதிக் குழாய்கள் கடினாமாகும்
* மனத்தளர்ச்சி.
* உடல் எடை அதிகமாதல்

தூங்காத நாட்களில் சட்டென்று கோபம், எரிச்சல் உண்டாவதை நானே உணர்ந்திருக்கிறேன்.

மேலும் பார்க்க: http://www.time.com/time/health/article/0,8599,1868406,00.html

டிசுக்கவரி சேனல் தமிழில்.

2009-11-09T10:44:00.000-08:00

கடந்த ஒரு மாதமாக டிசுக்கவரி சேனல் நிகழ்ச்சிகளை மாலை 6 மணி முதல் 12 மணி வரை தமிழில் ஒளி பரப்பி வருகிறது. தமிழ்த் தொலைக்காட்சிகளை விட நல்ல தமிழ் :).

ஒரு நிகழ்ச்சியில் வியப்பாக இருக்கிறது என்று கூறினார்கள். எனக்கு நினைவு தெரிந்து மக்கள் தொலைக்காட்சி தவிர மற்றவற்றில் இச்சொல்லைக் கேட்டதில்லை. நேற்று ஒரு நிகழ்ச்சியில் அலாசுக்கா பற்றிய நிகழ்ச்சியில் பனிச்சீவல் என்ற சொல்லைப் பயன்படுத்தினர். மிகவும் அருமை.

ஓயட்டும் ஒலிப்பான்கள்

2009-10-27T12:45:00.000-07:00

இன்று மாலை சாலையில் நடந்து கொண்டிருந்தேன். சிறிதும் பெரிதுமாக நூற்றுக்கணக்கான ஊர்திகள். சில நிமிடங்களில் பல வண்டிகள் இரு திசைகளிலும் என்னை நெருங்கிப் பின் கடந்து சென்றன. யாரும் சாலை விதிகளை மதிப்பதாகத் தெரியவில்லை. ஓயாத ஆரன் சத்தம்.

வாகனங்களில் செல்வோரில் குறிப்பிட்ட பகுதியினர் அளவுக்கு மீறி ஆரன் (Horn) அடித்துச் செல்கின்றனர். இரைச்சல் ஒருவரது மனநிலையைப் பாதிக்கும் . எரிச்சலை ஏற்படுத்தும். எப்படி இசைக்கு மனிதனை உற்சாகமாக மாற்றும் வல்லமை இருக்கிறதோ அதுபோலவே இரைச்சலுக்கும் எரிச்சலை ஏற்படுத்தும் திறன் உண்டு.

இதனால் மெல்லிதயம் கொண்டோர் சாலைகளில் நடக்கவே யோசிக்க வேண்டியிருக்கிறது. நாளடைவில் இது காதின் கேட்கும் திறனையும் பாதிக்கக்கூடும்.

காலையில் இது போன்று இரைச்சலால் காலைப்பொழுதிலேயே மக்கள் தங்கள் பொறுமை இழந்து அன்றைய நாளின் போக்கே மாறிவிடக்கூடும். மக்களிடையே பொது இடங்களில் சகிப்புத் தன்மை குறைந்து வருவதை நாம் கண்கூடாகக் காண்கிறோம். அதற்கு இந்த இரைச்சலும் காரணமாக இருக்கலாம்.

இயன்ற வரை ஒலிப்பானைப் பயன்படுத்துவதைக் குறைத்துக் கொள்வோம். சாலையில் மற்றவர்கள் மீது கோபத்தைக் காட்டவேண்டாம். சாலை விதிகளை மதிப்போம். rash driving - செய்வைத் தவிர்ப்போம். ஆயிரக்கணக்கானோர் பைசா செலவில்லாமல் சமூகத்திற்குச் செய்யும் நன்மைகளுள் இது முக்கியமான ஒன்றாக இருக்கக்கூடும்.

சோலைக் காடுகளில் இருநாட்கள் - பகுதி 1

2009-10-09T12:33:00.000-07:00

இந்த ஆண்டு ஓணம் பண்டிகையை ஒட்டி கேரள மாநிலத்தில் உள்ள இடுக்கி அணை பொதுமக்களின் பார்வைக்கு திறந்து வைக்கப்பட்டிருப்பதாகவும் அங்கு செல்லலாம் என்றும் கூறினார்.

கேரளம் செல்ல வேண்டும் என்பதும் மேற்குத்தொடர்ச்சி மலைக்குச் செல்ல வேண்டும் என்பதும் என்னுடைய நெடுநாள் அவா.

கோவையில் இருந்து இடுக்கி சென்று திரும்பி வர வேண்டும். வழியில் வேறு ஊர்களுக்குச் சென்று வரமுடியுமா என்று விசாரித்ததில் உடுமலைப்பேட்டை, மூணார் வழியாக இடுக்கி அணைக்குச் செல்லமுடியும் என்றும் கம்பம் வழியாகவும் செல்ல முடியும் என்றும் தெரிந்தது. எனவே நாங்கள் செல்லும் போது மூணார் வழியாகவும் வருகையில் கம்பம் வழியே வருவதாகவும் திட்டம்.

ஏழு எட்டு பேர் சேர்ந்து செல்லலாம் எனத்திட்டமிட்டு கடைசியில் நால்வர் செல்வதாக முடிவானது. எனவே நாங்கள் ஒரு டாட்டா இண்டிகா வண்டியை வாடகைக்கு அமர்த்தினோம். சனிக்கிழமை காலை புறப்பட்டு முதல் மூணாரிலும் மறுநாள் இடுக்கி அணையிலும் இருப்பதாக முடிவு.

காலை ஐந்து மணிக்கு கோவையில் இருந்து புறப்பட்டோம். பொள்ளாச்சியில் வண்டியை நிறுத்தி டீ குடித்தோம். வண்டி சென்ற பாதையில் காற்றாலைகள் அமைதியாக மின்சாரம் உற்பத்தி செய்துகொண்டிருந்தன. உடுமலையை அடைந்து பின்னர் சின்னாறு காப்புக் காட்டின் வழியாகச் செல்ல வேண்டும். வழியில் அமராவதி நகர் உள்ளது. அங்கு நடுவண் அரசின் சைனிக் பள்ளி உள்ளது. காலையில் மாணவர்கள் சீருடை அணிந்து வரிசையாகச் சென்று கொண்டிருந்தனர்.

பின்னர் சின்னாறு வனப்பகுதிக்குள் நுழைந்தோம். கானகம் வறண்டிருந்தது. நான்கைந்து கிலோமீட்டர்கள் சென்றிருப்போம். அங்கு சில கரியநிறக் குரங்குகளைக் கண்டோம். எங்ககளைப் போலவே மற்றொரு குழுவினரும் வண்டியை நிறுத்திப் பார்த்துக் கொண்டிருந்தனர். சின்னாறே மலையின் தொடக்கம். மேலே செல்லச்செல்ல வெயில் குறைந்தும் பசுமை மிகுந்தும் வந்தது.

சற்று நேரந்தில் மரையூர் என்னும் ஊரை அடைந்தோம். உடுமலைக்கும் மூணாறுக்கும் இடையில் உள்ள ஊர் அது. அங்கு காலை உணவை முடித்துப் புறப்பட்டோம்.

தொடரும்...

ஈரோடு புத்தகத் திருவிழா - 2009

2009-08-04T14:32:00.000-07:00

எங்கள் ஈரோட்டில் சூலை 31 முதல் ஆகத்து 11 வரை புத்தகத் திருவிழா வ.உ.சி மைதானத்தில் நடக்கிறது. கடந்த காரிநாள் நானும் எனது பெற்றோரும் கண்காட்சிக்குச் சென்றோம். மைதானம் பேருந்து நிலையத்திற்கு அருகிலேயே உள்ளது. மொத்தம் 167 கடைகள் இருப்பதாகவும் அவற்றுக்கான இடங்கள் குலுக்கல் முறையில் முடிவுசெய்யப்பட்டதாகவும் நிகழ்ச்சியை நடத்தும் மக்கள் சிந்தனைப் பேரவையின் நிறுவனர் ஸ்டாலின் குணசேகரன் ஐயா கூறினார்.

ஏற்பாடுகள்

கண்காட்சியானது மிகவும் நேர்த்தியாக அமைக்கப்பட்டிருந்தது. சதுரவடிவில் கடைகள் அமைக்கப்பட்டிருந்தன. மொத்தம் 167 கடைகள். அவற்றில் சில ஆங்கில நூல் அங்காடிகள். சில கணினி வட்டு, மென்பொருட்கள் விற்கும் அங்காடிகள். மற்றவை தமிழ்ப் பதிப்பகங்கள். நடுவில் உள்ள இடத்தில் பேச்சுமேடை அமைந்திருந்தனர். கழிப்பிட வசதி, மின் வசதி, வெளியே உணவகம் போன்றவையும் நன்கு அமைக்கப்பட்டுள்ளன.

நூல்கள்

இதற்கு முன்னர் நான் சென்ற பெரிய புத்தகக் காட்சியானது சென்னையில் நடந்த புத்தகக் காட்சியாகும். ஈரோட்டில் புத்தகத் திருவிழாவிற்குச் செல்வது இதுவே முதல்முறை. இம்முறை எனது குறி விலங்கியல் பற்றிய நூல்கள். தமிழில் விலங்குகள் குறித்த நூல்கள் குறைவே. எழுதுபவர்களும் குறைவே. தியடோர் பாஸ்கரன், முகமது அலி ஆகியோரின் நூல்கள் பெரிய பதிப்பகங்களின் கடைகளில் காணப்பட்டன. நேசனல் புக் டிரட்டு பதிப்பகத்தாரின் சிறுவர்க்கான நூல் வரிசையில் ரோமுலசு விட்டேக்கரின் நம்முடன் வாழும் பாம்புகள், ஆமைகள்-முதலைகள் உலகம் ஆகிய இரு நூல்களை வாங்கினேன். இவற்றைத் தவிர எஸ். ராமகிருஷ்ணனின் கோடுகள் இல்லாத வரைபடம் என்னும் கட்டுரை நூல், ஒரு பொதுஅறிவு நூல் ஆகியவையும் வாங்கிய புத்தங்களில் அடக்கம்.

சிறப்புரை

புத்தகத்திருவிழாவில் மாலைவேளைகளில் நாளைக்கு இருவராக அறிஞர் பெருமக்கள் உரையாற்றுகின்றனர். இதனைக் கேட்பதற்கான மக்கள் கூட்டம் குறிப்பிடத்தக்க அளவு இருந்தது. எனக்குத் தெரிந்தவர்கள் (அயலூர்களில், 15-20 கிலோமீட்டர் தொலைவில் உள்ளோர்) சிலர் தொலைவில் இருந்த வந்திருந்தனர். என் கல்லூரி ஆசிரியர்கள் இருவரைக் கண்டேன். ஒருவருடன் பேசும் வாய்ப்புக் கிடைத்தது. என் தந்தையின் நண்பர் ஒருவரையும் சந்தித்தேன். மாலைநேரச் சிறப்புரைகளைக் கேட்பதற்காகவே நாளும் வருவதாகக் கூறினார்.

சனிக்கிழமையன்று (1-ஆக-2009) வழக்கறிஞர் சுமதியும் பேராசியர் ஞானசம்பந்தனும் உரையாற்றினர். திடல் நிறைந்து இருந்தது. ஞானசம்பந்தன் அவர்கள் மிகவும் நகைச்சுவையாகப் பேசினார். பழந்தமிழ் பாடல்களில் இருந்து மழைபோல் மேற்கோள்களைப் பொழிந்தார். புத்தகம் வாங்க ஊக்குவித்தார். உரையானது சுமார் ஒன்பது மணியளவில் நிறைவடைந்தது. ஞானசம்பந்தன் அவர்கள் பேசிமுடித்ததும் புத்தகத் திருவிழாவை நடத்தும் குணசேகரன் அவர்கள் நிறைவுரை ஆற்ற வந்தார். என்ன ஒரு வருத்தமென்றால் அதுவரை அமர்ந்திருந்த மக்கள் அவர் பேசுவதைக் கேட்கப் பொறுமையில்லாமல் எழுந்து சென்றதுதான். இது போலத்தான் திரையரங்குகளிலும் நாம் பார்த்து ரசிக்கும் படத்திற்காக உழைத்த மனிதர்களின் பெயர்களைக் காட்டிக்கொண்டிருக்கையில் மக்கள் இதை கவனியாமல் எழுந்து செல்வதும்.

இத்தனையும் வருடாவருடம் பார்த்துக் கொண்டு ஊக்கத்துடன் செயல்படும் குணசேகரன் அண்ணன் உண்மையிலேயே போற்றுதற்குரியவர்.

மீண்டும்

இன்று (5-ஆக-2009, புதன்) மீண்டும் செல்ல எண்ணியுள்ளேன். நான் விரும்பி வாசிக்கும் எஸ். ராமகிருஷ்ணன் உரையாற்றுகிறார். நிறைவுநாளன்று மேதகு அப்துல் கலாம் அவர்கள் வருகின்றார்.

மெல்லச் சுருங்கி வரும் வாலாங்குளம்

2009-06-05T15:24:00.001-07:00

கோவையில் உக்கடத்திற்கும் திருச்சி சாலைக்கும் இடையில் அமைந்திருக்கிறது வாலாங்குளம். தற்போது இக்குளம் முழுதும் ஆகாயத்தாமரை முளைத்துப் பரவி குளம் முழுதும் போர்வை போன்று படர்ந்து விட்டது. இதனால் நீர் விரைவில் வற்றிவிடும். கட்டிடக்கழிவுகள் (பழைய கட்டிட இடிபாடுகளான செங்கற்காரை போன்றவை) இதன் கரைகளில் தொடர்ந்து கொட்டப்படுகின்றன. இதனால் சிறிதுசிறிதாக கரையின் சுற்றளவு குறையும். இது மட்டுமன்றி மற்றொரு பக்கம் ஏரி வறண்டிருக்கும் போது அதன்மீது மண்மேடமைத்து குடியிருப்புகளும் வந்துவிட்டன.

கரையில் ஏராளமான நெகிழிக்கழிவுகளும் இடப்பட்டு வருகின்றன. இதே போக்கில் செல்லுமானால் ஏரியின் பரப்பு சிறுகச்சிறுகச் சுருங்கி மறைந்தே விடக்கூடும் அல்லது நீரின் கொள்ளளவு மிகவும் குறைந்துவிடக்கூடும்.

இதனைத் தடுக்க நாம் ஆவண செய்யவேண்டும். ஏரிகளைப் புதிதாக வெட்டவியலாத நிலையில் குறைந்தது இருக்கும் ஏரிகளையாவது பாதுகாக்க வேண்டும். பொதுமக்கள் கட்டிடக் கழிவுகளை நகருக்கு வெளியே சென்று கொட்டலாம்.

இவ்வாறு இருக்கும் போதே எண்ணற்ற பறவைகளின் வாழிடமாக விளங்கும் இவ் ஏரி நன்கு பராமரிக்கப்பட்டால் நகருக்கு அழகு சேர்க்கும்.

புதிய செய்தி (29 அக்டோபர் 2009)

சிறுதுளி அமைப்பினரின் முயற்சியாலும் மாவட்ட ஆட்சியரின் நடவடிக்கையாலும் வாலாங்குளத்திற்கு நீர் கொண்டு வரும் வாய்க்காலில் உள்ள குப்பைகள் அகற்றப்பட்டு நீரானது வாலாங்குளத்திற்கு வரத்துவங்கியுள்ளது :)

காய்ந்திருக்கும் மருத்துவமனை சுங்கம் பகுதிகளுக்கு இடையில் உள்ள குளப்பகுதியில் மிகச்சிறிதளவு நீர் பாய்ந்து வருகிறது. பாதி அளவு ஆகாயத் தாமரைகள் காய்ந்திருப்பினும் இன்னும் ஒருபகுதியில் உயிரோடு இருக்கின்றன. இவை விரைவில் பெருகக் கூடும். இவற்றை நிரந்தரமாக அழிப்பதற்கு ஒரு வழி கண்டுபிடிக்கப்பட வேண்டும்.

புதிய செய்தி (22 நவம்பர் 2009)
குளம் கடந்த மாதம் பெய்த மழையினால் ஏறத்தாழ நிறைந்து விட்டது. :)

பேரூர்ச் செலவு

2008-12-14T05:48:00.000-08:00

பேரூர் பட்டீசுவரர் கோவிலுக்கு நானும் என் பெற்றோரும் இன்று சென்று வந்தோம். கோவையில் இரயில் நிலையத்தில் இருந்து உள்ளூர்ப் பேருந்தில் செல்ல 3 ரூபாய் 50 காசுகள் கட்டணம். ஏறக்குறைய 10 கிலோமீட்டர் தொலைவு இருக்கக் கூடும்.

இப்பட்டீசுவரர் கோவில் இரண்டாயிரம் ஆண்டுகள் பழமையானது, கரிகால் சோழனால் கட்டப்பட்டது என கோவிலின் உள்ளே இருந்த பிளக்சு போர்டு எனப்படும் நெகிழிப் பதாகையில் எழுதியிருந்தது. கோவிலுக்கு இதற்கு முன்னரே நான்கைந்து முறை போயிருந்தாலும் இன்றே இச்செய்தியைத் தெரிந்து கொண்டோம். இது போன்ற அருமையான தரவுகளை கிழிந்து போகும் தாளில் எழுதாமல் கல்வெட்டுக்களில் பொறித்து வைத்தால் பின்வரும் தலைமுறைகள் பயன்பெறும்.

உள்ளிருக்கும் இறைவனின் பெயர் பட்டீசுவரர். இறைவியின் பெயர் பச்சைநாயகி. கோவிலில் ஓரளவு கூட்டம் இருந்தது. பட்டீசுவரரின் மண்டபத்திற்கு பக்கவாட்டில் கனகசபை உள்ளது. நடராசர் வீற்றிருக்கிறார். இச்சபையின் இருபுறமும் உள்ள தூண்களில் மிக அழகிய சிற்பங்கள் உள்ளன. மிகவும் நுட்பமாக வடிக்கப்பட்டுள்ள இச்சிலைகளின் சிறப்புகளைப் பற்றி பலகைகளில் எழுதியும் வைத்துள்ளனர். என்னைப் போன்ற அறியாதோர்க்கு சிலையின் நுட்பமான கூறுகளை ரசிக்க அவை உதவும். வீரபத்திரரின் சிலை, யானையைப் பிளந்து அதன் தலைமேல் நின்றுகொண்டு அவ் யானையின் தோலைப் போர்த்தியிருக்கும் சிவனின் சிலை போன்றன மிகவும் அருமை.

அப்போது பகல் ஒரு மணியாகி விட்டதால் கோவில் நடைசார்த்தப் படும் என அறிவித்தனர். மீண்டும் நான்கு மணிக்கே நடை திறக்கப்படும். எனவே அதிக நேரம் ~~செலவழிக்க~~ (மகிழ்ச்சி பெருக்க) முடியாது போய்விட்டது.

இன்னொரு முறை செல்கையின் நிறைய நேரம் இருந்து இன்னும் நிறையப் பார்த்து காட்சியின்பம் பெற நினைத்துள்ளேன்.

கோவில் நொய்யல் ஆற்றின் கரையிலேயே அமைந்துள்ளது. சில நூறு அடிகள் நடந்து சென்று பார்த்தோம். ஆற்றின் கரைப் படித்துறையை ஒட்டி இராகு கோவில் ஒன்றும் உள்ளது. ஆற்றில் சிலர் துணி துவைத்துக் கொண்டிருந்தனர். ஆற்றில் நீர் ஓடவில்லை. தேங்கி நின்று கொண்டிருப்பதாகவே தோன்றியது. இவற்றைப் பார்த்துவிட்டு மதியம் இரண்டு மணியளவில் திரும்பி வந்தோம்.

திரும்பி வருகையில் பேருந்து உக்கடம் பெரியகுளம் வழியாக வந்தது. மழைக்காலம் முடிந்து குளங்களில் ஓரளவு நீர் நிறைந்திருந்தது. மழை வருவது போல் வானம் கருக்கிக் கொண்டிருந்ததால் சூழல் இனிமையாக இருந்தது. குளத்தில் நிறைய பறவைகள் இருந்தன. எனக்கு அவற்றுள் அடையாளம் தெரிந்தவை கொக்கு, நாரை, கூழைக்கடா மட்டுமே. கூழைக்கடாப் பறவைகள் பத்து இருபது அழகாக நீந்திக் கொண்டிருந்தன. நீண்ட அலகுகள் கீழே தொங்கிக் கொண்டிருக்கும் பை போன்ற அமைப்பு, மிகவும் அழகாக இருந்தது. கரையை ஒட்டியே பறவைகள் இருந்ததால் பேருந்தில் செல்லும் போதே ஓரளவு நன்றாகப் பார்க்க இயன்றது.

வீட்டுக்கு வருகையில் தேடுங்கள் கண்டடைவீர்கள் என்ற வாசகம் நினைவுக்கு வந்தது.
நான் நினைத்துகொண்டேன், அழகைக் காண நீண்டதூரம் செல்ல வேண்டியதில்லை. நம்மைச் சுற்றியே அழகு கொட்டிக் கிடக்கிறது. காணக் கற்றுக் கொண்டால் போதும்.

இயற்கை அன்னையின் அருளால் இந்த ஞாயிறு இனிய ஞாயிறாகக் கழிந்தது.

அன்று மின்று மென்றும்

2008-12-12T11:45:00.000-08:00

மும்பைக் குண்டு வெடிப்புகள் - நூற்றுக்கணக்கானோர் சாவு

குற்றவாளி தன் அம்மாவைப் பார்க்க வேண்டுமெனல்

தமிழகக் கரையோரம் வெள்ளத்தில் நெற்சேதம் - மக்கள் உயிர்ச்சேதம்

மக்கள் எதிர்பார்ப்பு: தீவிரவாதத்தில் இருந்து பாதுகாப்பு, வெள்ள நிவாரணம்

----

நாட்டு மக்கள் எல்லாம் மன்னவனின் (ஆட்சியாளர்) செங்கோலை நம்பி வாழ்வர். குழந்தைகள் தம் தாயின் பால் தரும் முலையை நம்பி உயிர்வாழும். உலகமக்கள் வான்மழையை நம்பி வாழ்வர். கூற்றுவனோ மக்களின் சாவை எதிர்நோக்கியிருப்பான்.

கோல் நோக்கி வாழும், குடி எல்லாம்; தாய் முலையின்
பால் நோக்கி வாழும், குழவிகள்; வானத்
துளி நோக்கி வாழும், உலகம்; உலகின்
விளி நோக்கி இன்புறூஉம், கூற்று. நான்மணிக்கடிகை 26

நான்மணிக்கடிகை - பாடல் 4

2008-12-12T11:02:00.000-08:00

ஒருவன் பிறப்பைக் கொண்டு அவனை உயர்வாகவோ தாழ்வாகவோ நினைத்தலாகாது.

சேற்றில் முளையாதோ செந்தாமரை?

கள்ளியின் வயிற்றில் அகில் (?) பிறக்கும். மானின் வயிற்றில் கஸ்தூரி என்னும் அரிதாரம் பிறக்கும். உயர்ந்த முத்து கடலுக்குள்ளே பிறக்கும். அது போல நல்ல மனிதன் பிறக்கும் குடி எதுவென யாரறிவார்?

கள்ளி வயிற்றி இன் அகில் பிறக்கும்; மான் வயிற்று
ஒள் அரிதாரம் பிறக்கும்; பெருங் கடலுள்
பல் விலைய முத்தம் பிறக்கும்; அறிவார் யார்,
நல் ஆள் பிறக்கும் குடி?

வேட்டை

2008-11-27T09:34:00.000-08:00

காட்டுப் புலிகள்
வேட்டையாடினோம் வீரத்தோடு
வரிப்புலிகள்
இப்போது புத்தக வரிகளில் மட்டுமே புலிகள்

வெள்ளோடு பறவைகள் சரணாலயம்

2008-11-03T06:57:00.000-08:00

வெள்ளோடு பறவைகள் சரணாலயத்திற்கு கடந்த ஞாயிறன்று நானும் எனது தந்தையும் சென்றிருந்தோம். மழைக்காலம் தொடங்கி விட்டதாலும் வேடந்தாங்கல் சரணாலயம் நவம்பர் 1 அன்று திறப்பதாக தொலைக்காட்சியில் பார்த்ததாலும் ஆர்வம் மேலிடச் சென்றேன்.

அங்கு பறவைகள் அதிகம் இல்லை. எனக்குப் பல பறவைகளின் பெயரும் தெரியாது. அங்கிருந்த ஐந்து ஆறு வகைப் பறவைகளில் எனக்கு அடையாளம் தெரிந்தது கொக்கு மட்டுமே.

மரங்கள் மிகவும் குறைவு. இப்போது தான் கரையோரம் மரக்கன்றுகள் நட்டிருக்கின்றனர். காட்சிக்கோபுரமும் கட்டிக்கொண்டுள்ளனர்.

எரிபொருள் சிக்கனம்

2008-10-30T09:00:00.000-07:00

எரிபொருள் சேமிக்க:

* மகிழுந்தில் (Car) செல்வோர் வாரம் ஒரு நாள் மோட்டார் சைக்கிளில் செல்லலாம்
* நீண்ட தொலைவானால் பேருந்திலோ, இரயிலிலோ செல்லலாம்
* சிறு தொலைவானால் மிதிவண்டியில் செல்லலாம்.
* நகரப் பேருந்தானால் ஒரு நிறுத்தம் முன்னதாகவே இறங்கிச் செல்லலாம்.
* மின்தூக்கியில் (லிப்ட்) செல்வோர் ஒரு தளம் முன்னதாகவே இறங்கிச் செல்லலாம்.
* புதிதாக வீடு கட்டுவோர் நன்கு வெளிச்சமும் காற்றும் வருமாறு கட்டினால் மின்சாரச் செலவைக் குறைக்கலாம்.

வசந்தம்

2008-10-28T09:13:00.000-07:00

திருப்பூரை அடுத்துள்ள வஞ்சிபாளையத்தில் உள்ள ஒரு குளத்தில் கடந்த கிழமைகளில் பெய்த மழையினால் நீர் நிறைந்துள்ளது. பல நீர்ப்பறவைகளை சில மாதங்களுக்குப் மீண்டும் வந்துவிட்டன. கருப்பும் வெள்ளையுமாய் பறவைகள் அமைதியான அக்குளத்தில் நீந்துவதே தனி அழகு.

கோவைக்கு இரயிலில் செல்லும் போது கண்ட காட்சி.

தமிழ் ஊர்ப்பெயர்கள் - ஊர் வகைகள்

2008-02-15T02:56:00.000-08:00

௧. ஊர்

நெல்லூர், பேரூர், திருநின்றவூர், தஞ்சாவூர்

௨. பாக்கம்

விருகம்பாக்கம், நுங்கம்பாக்கம், கோடம்பாக்கம்

௩. சேரி

புதுச்சேரி
வேளச்சேரி

௪.பட்டினம்

நாகப்பட்டினம்
குலசேகரன்பட்டினம்

௫. பட்டி

புதுப்பட்டி, வடுகபட்டி

௬. பாளையம்

இராசபாளையம், பள்ளிபாளையம்

௭. கோட்டை

புதுக்கோட்டை, பழையகோட்டை, பட்டுக்கோட்டை, தேவகோட்டை

௮. தாங்கல் - ஒரு நீர்நிலையின் பெயர்

ஈக்காட்டுத்தாங்கல்
வேடந்தாங்கல்

௯. ஏந்தல் - நீர்நிலையின் பெயர்

௧0. ஏரி - நீர்நிலையின் பெயர்

௧௧. குளம் - நீர்நிலையின் பெயர்
காயங்குளம்
கூந்தன்குளம்
பெரியகுளம்

௧௨. கரை

மதுக்கரை

௧௩. மலை

திருவண்ணாமலை

௧௪. குன்று
திருப்பரங்குன்றம்
செங்குன்றம்

௧௫. கல்

நாமக்கல்
திண்டுக்கல்

௧௬. கோடு - மலை என்னும் பொருளும் கொள்ளும்.

திருச்செங்கோடு

௧௭. காடு

பழவேற்காடு
திருவேற்காடு

௧௮. பள்ளி - சமணப் பள்ளி

திருச்சிராப்பள்ளி
அனுமன்பள்ளி

௧௯. துறை - படகுத் துறை,

பெருந்துறை, ஆடுதுறை, பூந்துறை, மயிலாடுதுறை

௨0. ஆறு

திருவையாறு

௨௧. ஓடை

ஈரோடு (இரு ஓடை- ஈரோடை மருவி ஈரோடு), சித்தோடு (சிற்றோடை -> சித்தோடை -> சித்தோடு?)

௨௨. குடி

தூத்துக்கடி
காரைக்குடி

௨௩. மங்கலம்
விசயமங்கலம்
நீடாமங்கலம்
சத்தியமங்கலம்

பின்குறிப்பு:எண்களைத் தமிழ் முறையில் இட்டது நானல்ல. கூகுள் :)

பிள்ளையார் சுழி

2008-02-05T06:58:00.000-08:00

மாந்தர் சிலர் கூடி
கோவில் சென்று
தேங்காய் உடைத்துப்
பிள்ளையாரை வணங்கிப்
புறப்பட்டனர்
யானை வேட்டைக்கு.

வறுமை

2008-02-05T06:56:00.000-08:00

கிழிந்த சட்டையைத்
தைத்துப் போட்டேன்
மறைந்தது ஓட்டை
தெரிந்தது வறுமை

எழுத்துச் சீர்திருத்தம் - சில கருத்துக்கள்

2008-02-05T06:42:00.000-08:00

தமிழில் கிரந்த எழுத்துகளைப் பயன்படுத்துவதும் பயன்படுத்தாமல் எழுதுவதும் இருவேறு சாராரால் நடைமுறையில் உள்ளது. கிரந்த எழுத்துக்களைப் பயன்படுத்துபவர்கள் பெரும்பாலும் சொல்வது ஒலிப்புத் துல்லியம் இருக்கும் என்பதும் மொழி புதியன பெற்று தன்னைப் புதுப்பித்துக் கொள்ள வேண்டும் என்பதும் ஆகும். ஒரு மொழியின் ஒலிப்பு வடிவங்களை மாற்றும் போது அதன் இலக்கணமும் மாற வேண்டியிருக்கலாம்.

சப்பானிய மொழியில் டகரம் இல்லை. டகரச் சொற்களை அனைத்தையும் அவர்கள் தகரமாகவே பலுக்குவர். லகரமும் இல்லை. இவற்றை ரகரமாக ஒலிப்பர். ஒற்றெழுத்து இல்லை. உகரமாக ஒலிப்பர். சாக்கலேட்(Choocolate) - சோகோரேதோ எனப்படுகிறது.

செர்மானிய மொழியில் J ஒலிப்பு இல்லை ய என்றே சொல்கின்றனர்.

எனவே ஒரு வேற்று மொழிச்சொல்லை மற்றொரு மொழியில் உள்வாங்க வேண்டுமானால் அதன் நெடுங்கணக்கைக் கொண்டே உள்வாங்குதல் நன்று. இல்லையெனில் உலகில் உள்ள எல்லா மொழியில் உள்ள ஒலிப்புகளுக்கும் வரி வடிவம் தேட வேண்டியிருக்கும்.

வடமொழிச்சொற்களை எழுத கிரந்தம் (ஜ, க்ஷ,ஸ,ஹ, ஸ்ரீ)பயன்படுத்துகிறோம். தற்காலத்தில் ஆங்கிலப் பயன்பாடு தமிழரிடையே மிகுதி. அதனால் F என்ற ஒலிப்புக்கு ஃப் தேவை. நாளை வேறொரு மொழிச் சொற்கள் உள்வாங்கப்படுகையில் அவற்றின் ஒலிப்புக்கு வரிவடிவம் தேட வேண்டும்.

அச்சரேகை தீர்வுரேகை - நூற்குறிப்பு

2008-01-30T05:36:00.000-08:00

அண்மையில் அச்சரேகை தீர்வுரேகை என்ற விகடன் பதிப்பக நூல் ஒன்றை வாசித்தேன். முனைவர். எம். பி. இராமன் என்னும் கல்லூரிப்பேராசிரியரால் எழுதப்பட்டது. இது ஜூனியர் விகடனில் தொடராக வந்ததாம். பல நல்ல செய்திகளை உள்ளடக்கியது. ஆப்பிரிக்காவில் உள்ள சோப்புக்காய்கள், நம்மூர்க் குளங்களை படுத்தி வரும் வெங்காயத்தாமரை இந்தியாவிற்கு எவ்வாறு வந்தது போன்ற பல சுவையான தகவல்களை தந்துள்ளார் ஆசிரியர். இவர் எழுதிய மற்றொரு நூலான சூழல் படும் பாடு என்ற நூலை தற்போது வாசித்துக் கொண்டுள்ளேன். உயிரினப்பன்மை பேணுதல், சுற்றுச்சூழல் மாசடைதல், உலக வெப்பமாதல், இயற்கைப் பேரிடர்கள் (சுனாமி, எல் நினோ, எரிமலை வெடிப்பு) போன்றவை எளிமையாக விளக்கப்பட்டுள்ளது. படங்களும் நன்று. சுற்றுச்சூழல் பற்றிய ஒரு நல்ல புத்தகம்.

சொற்கள் - பங்களா

2008-01-09T04:53:00.000-08:00

பங்களா வீடு என்ற சொல் தற்காலத்தில் மாளிகை போன்ற வீட்டைக்குறிக்கப் பயன்படுகிறது. இது Bunglow என்ற ஆங்கிலச் சொல்லின் தமிழ் வடிவமாகும். இது வங்காளத்தில் கட்டப்பட்ட ஒருவிதமான வீடுகளைக் குறிக்க ஆங்கிலத்தில் பயன்படுத்தப்பட்ட சொல்.

ஈர்க்கு

2007-08-25T23:01:00.000-07:00

கடந்த வாரம் தமிழர் தாவரவியல் என்ற புத்தகத்தைப் புரட்டிக் கொண்டிருந்த போது ஈர்க்கு என்ற சொல் எதேச்சையாகக் கண்ணில் பட்டது. இதன் பொருள் புல் வகையின் இலை நரம்பு என்பது ஆகும். பின்னரே புரிந்தது நாம் ஏன் வீடு கூட்டும்(அ) பெருக்கும் விளக்குமாரை ஏன் ஈக்குமாரு எனச் சொல்கிறோம் என்று. தமிழில் சொற்கள் இவ்வளவு நுட்பமாக இருப்பது கண்டு மீண்டும் ஒரு முறை வழக்கம் போல் வியந்தேன். மகிழ்ந்தேன்.

ஜெயகாந்தன் சிறுகதைகள் இணையத்தில்

2006-04-24T02:34:00.000-07:00

எழுத்தாளர் ஜெயகாந்தனின் சிறுகதைகள் இணையத்தில் இங்கு கிடைக்கின்றன.

லால் பகதூர் சாஸ்திரிக்கு சம்பளம் அதிகமாம்

2006-04-04T10:19:00.000-07:00

சில நாட்களுக்கு முன் தினமணி இதழில் தலையங்கத்தில் நல்ல அரசியல்வாதி என்ற தலைப்பில் ஒரு கட்டுரை படித்தேன். அதில் முன்னாள் பிரதமர் லால் பகதூர் சாஸ்திரி வாழ்வில் நிகழ்ந்த ஒரு நிகழ்ச்சி பற்றி குறிப்பிட்டிருந்தார். நிகழ்ச்சி இதுதான். ஒருநாள் சாஸ்திரி தனது நண்பர் ஒருவரின் திருமணத்திற்கு செல்ல வேண்டியிருந்தது. அப்போது தன் நண்பருக்கு ஏதேனும் பரிசு வாங்கக்கூட பணம் இல்லையே என்று தனது மனைவியிடம் கூறினார். அவரது மனைவி, கவலைப்படாதீர்கள் இம்மாத சம்பளத்தில் நான் 25 (250? சரியாக ஞாபகம் இல்லை :-( ) ரூபாய் சேமித்து வைத்திருக்கிறேன் என்று கூறி அத்தொகையை சாஸ்திரியிடம் கொடுத்தாராம். அதைப் பெற்றுக்கொண்ட லால் பகதூர் அடுத்த மாதம் ஒரு கடிதம் எழுதினார். அது இந்திய அரசுக்கு எழுதப்பட்டது. கடிதத்தில் இருந்தது இதுதான். என்னுடைய சம்பளத்தில் மாதம் 25 ரூபாய் மீதம் ஆகிறது. எனக்கு இவ்வளவு சம்பளம் தேவையில்லை. என்வே அடுத்த மாததில் இருந்து 25 ரூபாயை பிடித்துக்கொண்டு கொடுங்கள் என்று எழுதி இருந்தார்.

இப்படிப்பட்ட அரசியல்வாதி ஒருவரையாவது எனது வாழ்நாளில் பார்த்துவிட வேண்டும் என்பது என் அவா. நடக்குமா தெரியவில்லை.

தமிழ் எழுத்துச் சீர்திருத்தம் தேவையா?

2006-03-21T10:16:00.000-08:00

தமிழில் எழுத்துச் சீர்திருத்தம் என்பது காலம் காலமாக நடந்து வரும் ஒன்று. காலத்திற்கு ஏற்ப தமிழ் எழுத்துக்களில் நானறிந்த வரை கடைசியாக பெரியார் வரை சீர்திருத்தம் செய்துள்ளார்கள். மேலும் வடமொழி எழுத்துக்களை உச்சரிப்பதற்காக ஜ, ஹ, ஷ போன்றவை அறிமுகப்படுத்தப் பட்டன அல்லவா? ஜப்பான் என்பதை யப்பான் எனவும் ஹஸ்தினாபுரம் என்பதை அஸ்தினாபுரம் எனவும் ஏன் மற்றி எழுத வேண்டும் என்றூ புரியவில்லை. ஆனால் K மற்றும் G ஆகியவற்றை வித்தியாசப்படுத்த எழுத்துக்கள் இல்லை. காற்று என்பதற்கும் காந்தி என்பதற்கும் ஒரே எழுத்தையே பயன்படுத்த வேண்டியுள்ளது. இதே போல ச, ட, த போன்ற போன்ற எழுத்துக்களும். கிரந்த எழுத்துக்களைப் போலவே இவற்றுக்கும் எழுத்துக்களை அறிமுகப்படுத்தலாம் என்பது என் கருத்து. மேலும் உகர ஊகாரங்களையும் சீர்திருத்தலாம். இவற்றைச் செய்தால் என்ன பிரச்சினைகள் என்று எனக்குத் தெரியவில்லை. தெரிந்தவர்கள் சொல்லவும்.

இது குறித்து வலைப்பதிவாளர்களின் கருத்துக்களை அறிய ஆவலாக உள்ளேன்.

தமிழக வாக்காளர் பட்டியல் - இணையத்தில்

2006-03-08T07:10:00.000-08:00

தமிழக வாக்காளர் பட்டியலில் உங்கள் பெயர் இருக்கிறதா எனத் தெரிந்து கொள்ள வேண்டுமானால் http://eroll.tn.nic.in/ இணையத்தளத்தில் தெரிந்து கொள்ளலாம்.

நான் பார்த்துவிட்டேன். என் பெயர் இருக்கிறது.:-))

மற்றொரு சிறப்பு வாக்காளர் பட்டியல் தமிழில் மட்டுமே உள்ளது.

தமிழும் தெலுங்கும் - ஒரு ஒப்புமை

2006-02-09T08:00:00.000-08:00

திராவிட மொழிகளான தமிழிலும் தெலுங்கிலும் ஒத்து வரும் வார்த்தைகளைக் காணலாம். இருக்கிறதா எனப்பொருள் தரும் உண்டா மெலிந்து உந்தா என அழைக்கப்படுகிறது. மிகவும் எனப்பொருள் தரும் சால என்ற வார்த்தை தமிழர்களின் பயன்பாட்டில் அருகி விட்டது. ஆனால் இன்றும் இது தெலுங்கில் பயன்படுத்தப் படுகிறது. மேலே - மீது, இது தெலுங்கில் மீதா எனப்படுகிறது. வேலை-பணி, இன்றும் பணி என்று வழங்குகிறார்கள்.

வெங்காயம் - உள்ளி, உள்ளி என்று வழங்குகிறார்கள். வெங்காய குடும்பத்தைச் சேர்ந்த பூண்டு வெள்ளை நிறத்தில் இருப்பதால் வெள்ளுள்ளி என்று அழைக்கப்படுகிறது. வண்டி திரிந்து பண்டி(Bandi) என்று அழைக்கப்படுகிறது. தெரியாது என்பது தெலியது எனவும் கூடாது என்பது கோடது எனவும் பலுக்கப்படுகிறது. செய்ய மாட்டேன் - செய்யேன், என்பது செய்யனு எனப்படுகிறது. அம்பு எய்தான் என்பதில் உள்ள எய் என்ற வினை எய் அல்லது வேய் என அழைக்கப் படுகிறது. இல்லம்-இல், இல்லு எனவும் கன்னடத்தில் மனை-மனெ எனவும் கூறப்படுகிறது. பசு-ஆ என தமிழில் அருகிவிட்டது. தெலுங்கில் ஆவு என்றழைக்கப்படுகிறது.

தகரம் சில இடங்களில் சகரமாக பலுக்கப்படுகிறது. உட்கார்-குந்து, குத்துகொள் என கன்னடத்திலும் குச்சு என தெலுங்கிலும் கூறப்படுகிறது.பைத்தியம் - பிது, பிச்சு என மாறுகிறது.

செய்துகொள் என்பதை சேஸ்கோ என்கின்றனர். வார்த்தை-வார்த்தா என்பது செய்தி எனப்பொருள் தருகிறது. றகரம் தகரமாகத் திரிகிறது. க்,ங் போன்றவற்றில் வரும் புள்ளியானது ஒற்று என்பது ஒத்து எனவும், பற்றிக்கொள் என்பதில் வரும் றகரம் திரிந்து பட்டுக்கோ எனவும் அழைக்கப்படுகிறது. எருது எத்து எனப்படுகிறது.

மற்றவை

உன் - நீ, உனக்கு - நீக்கு, நான் - நேனு, எனக்கு - நாக்கு, பெயர் - பேர், ஊர் -ஊர், எதற்கு - எந்துக்க்கு, யார், எவர்- எவரு, அது - அதி, ஆகி விட்டது - ஆயிட்டது - ஆயிந்து. போய்விட்டது-போயிட்டது-போயிந்து. நகைத்தல் - நவ்வுலு, காது - செவி - செவ்வு

பொதுவான சொற்கள்

சாப்பிடு - தின்னு, தாகம் தணி - தாகு, நித்திரை, பாடு, ஆடு, படு, போ, கால், கை, மெல்ல, உப்பு, பருப்பு - பப்பு, கடல் - கடலு.

பொதுவாகப் பார்த்தோமானால் எல்ல வார்த்தைகளுடனும் உகரம் சேர்த்துக்கொள்கிறார்கள். பன்மைக்கு லு சேர்க்கப்படுகிறது.

தமிழும் கன்னடமும் - ஒரு ஒப்புமை

2005-12-05T08:14:00.000-08:00

தமிழ் வார்த்தைகள் சில எவ்வாறு கன்னட வார்த்தைகளாகத் திரிகின்றன என்று தெரிந்து கொண்டால் கர்னாடகத்திலிருக்கும் தமிழர்கள் எளிதாக கன்னடம் கற்றுக்கொள்ள முடியும் என்று தோன்றுகிறது. ஏதோ என்னுடைய சிற்றறிவுக்கு எட்டியதை நாலு பேருக்கு சொல்ல வேண்டும் என்று மனது குதியாட்டம் போட்டதன் விளைவே இப்பதிவு. முதலில் வகரத்தினைப் பார்ப்போம். வகரமானது வடக்கே போகப்போக பகரமாகத் திரியும் என்று இராம. கி அவர்க்களின் வலைப்பதிவில் எப்போதோ படித்த ஞாபகம். அவ்வாறு பார்க்க முதலில் வா என்ற வினைச்சொல்லானது பா என்று திரிகிறது. வந்து விட்டார் என்பது பந்து பிட்டார் எனத்திரிகிறது. வேறு என்பது வேற என ஆகி பேற என சொல்லப்பட்டு வருகிறது. வகரம் பகரமானால் பகரம் என்னவென்று அழைக்கப்படும் என்று பார்த்தால் பகரமானது ஹகரமாக அழைக்கப்படுகிறது. பத்து ஹத்து எனவும் போகிறதா என்பது போகுதா எனத்திரிந்து ஹோகுதா என பலுக்கப்படுகிறது. நாம் மரியாதையுடன் ஒருவரை அழைக்க 'ங்கள்' என்று ஈற்றில் சேர்ப்பதைப்போல கன்னடத்தில் 'றி' அல்லது இகரம் சேர்க்கப்படுகிறது. நில்லுங்கள் என்பது நில்லி எனவும் வா என்று பொருள்படும் பா பன்னி அல்லது பன்றி எனவும் பலுக்கப்படும். குந்திக்கொள்ளுங்கள் என்பது குத்துக்கோள்றி எனவும் மாறுகிறது. இல்லை என்பது இல்லா எனவும் உணவு எனப்பொருள் தரும் ஊட்டம் ஊட்டா எனவும் வழங்கப்பெறும். கொஞ்சம் அல்லது குறைந்த எனப்பொருள் தரும் சொற்பம் சொல்பா எனப்படுகிறது. கொடுங்கள் என்பது கொடி என்ப்படுகிறது. ஆகி விட்டதா என்பது ஆகித்தா எனத்திரிந்து ஆயித்தா எனக்கூறப்படுகிறது.

வேண்டாம் என்பதில் வகரம் பகரமாகத்திரிந்து பேண்டாம் எனமாறி ஈறு கெட்டு பேண்டா எனவும் பின்னர் பேடா எனவும் மாறி அழைக்கப்படுகிறது. குடி குடி என்றே அழைக்கப்படுகிறது. தமிழின் ஐகாரமானது ஈற்றில் வந்தால் எகராமாகத்திரிகிறது. மழை என்பது மளெ எனவும் நாளை என்பது நாளெ எனவும் மனை என்பது மனெ வழங்கப்படுகிறது. நான் என்பது நானு எனவும் நீ என்பது நீனு எனவும் திரியும். பன்மையைக் குறிக்கும் 'கள்' விகுதி 'களு' என அழைக்கப்படுகிறது. கடை எனப்பொருள் தரும் அங்காடி அங்கடி எங்க்கூறப்படுகிறது. பெயர் என்ற வார்த்தையிலுள்ள பகரம் ஹகரமாகி ஈறில் உகரம் இணைந்து ஹெயரு என மாறியது. தமிழில் யகரமும் சகரமும் போலிகள். முயல் முசல் , அயலூர் - அசலூர் போன்றவற்றிலிருந்து இதனை அறியலாம். என்வே ஹெயரு என்பது ஹெசரு எனத் தோன்றியது.

உங்களுக்கு தெரியுமா?

2005-12-01T00:16:00.000-08:00

அமெரிக்க விண்வெளி ஆய்வு மையமான நாசா(NASA)வில் ஔவையாரின் கூற்றான ''கற்றது கைமண் அளவு, கல்லாதது உலகளவு'' ஆனது ஆங்கிலத்தில் மொழி பெயர்க்கப்பட்டு ("What you have learnt is handful, What you haven't is like the world") வைக்கப்பட்டுள்ளது. ஆதாரம்

பொய்யான கவிதை

2005-11-02T00:49:00.000-08:00

இது போன வருடம் எழுதிய கவிதை.
----------------------------------

மரங்களெல்லாம் காகிதங்களாய்
ஆனதால் தானோ என்னவோ
இப்பொழுதெல்லாம் மழை வருகிறது,
பத்திரிக்கைக் கவிதைகளில் மட்டும்.